Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão

AILEU, 01 jullu 2020 (TATOLI)–Progressu diskusaun ba Lei Antí Corrupção (LAC) iha loron ohin, Deputadu sira hosi Komisaun A hamutuk ho entidade relevante sira, konsege diskute artigu hamutuk 15, hosi titulu I medidas kombate korrupsaun, kapitulu II kona-ba Rejime Deklarasaun Bens no Interese Sira, ne’ebé iha sesaun VIII ho nia artigu hamutuk 39.

Notísia Relevante: Komisaun A Kontinua Diskute LAC Rejime Deklarasaun Bens no Interese iha Aileu

Durante diskusaun ne’e, Prezidente Komisaun A, Deputadu Joaquim dos Santos ‘Boraluli’, fó ninia apresiasaun ba bainaka sira ne’ebé aban bainrua sei sai hanesan implementadór ba LAC ne’e rasik, ne’ebé ho vontade di’ak tebes hodi partisipa ativamente iha prosesu diskusaun ne’e tomak.

Tanba, Joaquim dos Santos hateten iha duni interese katak Lei Antí Corrupção (LAC) ne’e tenke iha duni tanba hakarak atu kombate virus Korrupsaun iha Timor-Leste.

“Ami apresia tebes ho vontade no kontribuisaun hosi entidade judisiária sira, ne’ebé durante diskusaun ne’e partisipa to’o ohin iha Aisirimou Aileu,” Prezidente Komisaun A, Joaquim dos Santos, fó nia apresiasaun molok ensera diskusaun ba loron dahuluk, segunda ne’e. 

Molok deside pasa artigu sira ne’ebé mensiona, Deputadu Joaquim dos Santos “Boraluli”  ne’ebé lidera meza diskusaun, sempre fó oportunidade ba partisipante sira, liuliu órgaun kompetente sira atu fó sira nia apresiasaun no opiniaun konstrutivu sira iha ambiente amizade nian.

Artigu sanulu resin lima (15), ne’ebé konsege diskute mak hanesan artigu 34 ko’alia kona-ba deklarasaun agregadu familiare, artigu 35 ko’alia kona-ba moeda, artigu 36 ko’alia kona-ba formuláriu, artigu 37 ko’alia kona-ba aprezentasaun, artigu 38 ko’alia kona-ba autokorresaun, artigu 39 ko’alia kona-ba arrolamentu deklarantes, artigu 40 ko’alia kona-ba verifikasaun formál.

Kontinua  ho sesaun dalima (V) artigu 41 ne’ebé ko’alia kona-ba finalidade husi verifikasaun, artigu 42 ko’alia kona-ba Obrigatoriedade husi verifikasaun, artigu 43 kona-ba Verifikasaun Ad Hoc, artigu 44 kona-ba âmbitu verifikasaun nian, artigu 45 kona-ba Pedidu informasaun adisionál ba deklarante, artigu 46 kona-ba podér rekezita no hetan informasaun, artigu 47 ko’alia kona-ba rezultadu verifikasaun, no 48 kona-ba lakon propriedade.

Artigu sira ne’ebé deputadu sira diskute iha loron ohin, hanesan kontinuasaun hosi titulu I medida kombate korrupsaun, kapitulu II kona-ba Rejime Deklarasaun Bens no Interese Sira, ho nia sesaun VIII, iha ne’ebé antes ne’e diskute ona artigu 26 to’o 33 iha Otél Uma Liurai, Babulo Manufahi, semana kotuk.

Artigu hirak ne’e mak hanesan, sesaun I kona-ba finalidade, artigu 26 kona-ba finalidade, sesaun II autoridade kompetente, artigu 27 autoridade kompetente, sesaun III Deklarasaun propriedade no interese, artigu 28 kona-ba ema ne’ebé mak atu dekalara, artigu 29 kona-ba membru agregadu familiares husi dekalarante, artigu 30 kona-ba deklarasaun ad hoc, artigu 31 kona-ba priorisidade deklarasaun, artigu 32 kona-ba obrigasaun depózitu bankária, no artigu 33 kona-ba konteúdu husi deklarasaun.

Entretantu, entidade relevante sira ne’ebé partisipa mós iha diskusaun ne’e mak hanesan Vise Ministru Justisa, José Edmundo Caetano ho diretór Nasionál Assessoria Jurídika no Lejislasaun (DNAJL) sigla Portugés) Ministériu Justisa, Adjuntu Prokuradór Jerál Repúblika Alfonso Lopez,  Estrutura KAK kompostu husi komisáriu Sérgio Hornai, Komisáriu Adjuntu Augusto Castro, ho Luis Sampaio, Diretór Jerál Prevensaun no Sensibilizasaun Rosário de Araújo, akompaña husi Asesora Jurídika Mariman Oliveira.

Iha diskusaun ne’e, Diretór Polisia Sientifika Investigasaun Kriminál (PSIK), Vicente Fernandes Brito, mós marka prezensa, provedora Provedoria Direitus Umanus no Justisa Jesuinha Gomes, Asessór Jurídiku Komissaun A Parlamentu Nasionál, Anildo da Cruz ho Pedro Andrade, Diretora Ezekutiva Organizasaun Naun Governamentál Programa Monitarizasaun ba Sistema judisiária (JSMP), Ana Paula Marçal, Reprezentante Grupu Feto Parlamentár Timor-Leste (GMPTL sigla Portugés).

Tuir planu, diskusaun ne’e sei la’o durante loron haat (4), hahú ohin, to’o sábadu loron 4 fulan jullu tinan ne’e.

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here