Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida. Imajen Tatoli/Evaristo Soares Martins.

DILI, 02 jullu 2020 (TATOLI)—Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida, afirma bainhira esbosu-lei kriminaliza difamasaun hetan aprovasaun sei “blokeia” fali implementasaun Lei Antí Corrupção (LAC).

“Ha’u hanoin iha buat ruma la loos. Saida mak la loos ne’e, ukun na’in sira mak tenke dehan ba ita, tanbasá? Ba sé-nia interese mak sira agora debate esbosu lei kriminaliza difamasaun atu aprova hodi implementa. Ulun-boot sira seidauk dehan ba ita tanbasá mak prioridade lei kriminaliza difamasaun ne’e. Se ezbosu ne’e sira aprova duni, sei ‘blokeia’ implementasaun Lei Antí Corrupção (LAC) tanba lei krimializa difamasaun ne’e defende hela sira-ne’ebé kaer ukun ne’e,” Diretór CEPAD ne’e informa ba Agência TATOLI iha nia rezidénsia, Bidau, Dili, kinta ne’e.

João Boavida esplika, iha situasaun atuál entre Lei Antí Corrupção (LAC) no Lei Kriminaliza Difamasaun sai debate iha públiku. Nia haktuir, Lei Antí Corrupção (LAC) hamosu kleur ona ho prosesu ne’ebé naruk tebes no lei difamasaun ne’e mosu iha primeiru Governu Konstitusionál entaun lei ne’e mós tama gaveta laran.

Agora, nia dehan, lei kriminaliza difamasaun ne’e sai kestaun boot ba tanba hamosu fali esbosu ne’e iha períodu Estadu Emerjénsia (EE) tanba kauza hosi COVID-19 ne’e.

Bainhira nasaun ida, nia dehan, iha hela Estadu Emerjénsia hasoru situasaun perigu hanesan surtu COVID-19 entaun nein Parlamentu Nasionál no nein Governu hamosu situasaun ida-ne’ebé atu aprova ka debate lei ida hanesan kriminaliza difamasaun iha Estadu Emerjénsia enkuantu ema hotu nia atensaun fou ba atu bele prevene no kombate COVID-19.

Nia dehan, prosesu ne’e Governu halo sala tiha ona tanba loloos ne’e labele tanba Estadu Emerjénsia,tenke haluha buat hotu mosu nu’udar polítika ka inisitiva ruma.

Tanba ne’e, diretór CEPAD ne’e husu Governu liuhosi Ministru Justisa, Manuel Cárceres, atu esplika razaun prioritiza esbosu-lei kriminaliza difamasaun tanba Timor-Leste la merese implementa lei ne’e.

“Se esbosu ne’e ninia alvu atu kriminaliza mídia sosiál, ha’u hanoin ministru nia razaun la forte. Ha’u hanoin ulun-boot sira tenke esplika ba jornalista no públiku tanbasá mak kriminaliza difamasaun. Tanba ema sira-ne’ebé ho liafuan iha facebook ne’e maioria mate-klamar (ID falsu). Agora Governu atu kriminaliza sé. Ha’u hanoin to’o agora jornalista sira seidauk uza liafuan insulta hasoru ema boot sira,” Diretór CEPAD ne’e fó hanoin ba Ministru Justisa Manuel da Costa Cárceres.

Nia fó hanoin ba entidade hotu katak, se ema hotu iha vontade kombate korrupsaun iha Timor-Leste di’ak liu foka mak Lei Antí Corrupção (LAC) no labele iha tán lei kriminaliza difamasaun.

“Ema kuandu sai polítiku ne’e sai figura públiku. Ema kuandu la gosta polítika tanba falta transparénsia, akuntabilidade ka responsabilidade mak laiha. Povu iha direitu tau-matan ba lala’ok governasaun ida. Agora se povu hasai liafuan ida konsidera kedas kriminozu hodi ba hatán iha tribunál entaun laiha sentidu,” nia dehan. 

“Se sira aprova duni lei difamasaun ne’e sei kaer ema-ida, ninia implementasaun sei kaer fali sira rasik tanba sira baku-malu iha parlamentu. Sira estraga sasán estadu nian hanesan akontese iha parlamentu. Krime korrupsaun mós sira rasik mak prátika. Krime difama malu ne’e mós sira mak prátika ba malu,” Diretór Ezekutivu CEPAD, João Boavida, hateten.

Diretór CEPAD ne’e, la konkorda esbosu-lei kriminaliza difamasaun atu eziste iha Repúblika Demokrátika Timor-Leste (RDTL).

Jornalista : Evaristo Soares Martins

Editór       :  Cancio Ximenes

HAKEREK NO HATÁN

Please enter your comment!
Please enter your name here