Embaixadór Uniaun Europeia (EU) iha Timor-Leste (TL), Andrew Jacobs. Imajen Taroli/Cipriano Colo

DILI, 30 juñu 2020 (TATOLI)-Uniaun Europeia prevee tan osan millaun $ 3 atu fó apoiu ba Governu Timor-Leste hodi kombate no halo metigasaun ba surtu COVID-19.

Embaixadór Uniaun Europeia iha TL, Andrew Jacobs, atualiza informasaun ne’e ba Primeiru-Ministru, Taur Matan Ruak iha Palacio do Governo Dili, ohin.

“Ami sei iha osan ho montante millaun $ 3 ne’ebé ami prevee hela inklui ho osan millaun $ 3 ne’ebé ami fó ona ba Governu, entaun totál osan ne’ebé ami fó hodi apoiu kombate COVID-19 hamutuk millaun $ 6,” dehan nia ba Jornalista Sira.

Notísia Relevante :Uniaun Europeia Husu Povu TL Mantein Prevene COVID-19

Durante mosu kazu surtu coronavirus, nia tenik tan UE nafatin reforsa ninia kooperasaun ho Timor-Leste liuhusi apoiu orsamentu ba Governu hodi luta hasoru pandemia globál ne’e.

“Iha pandemia COVID-19 nia laran Uniaun Europeia lá suspende nia programa kooperasaun ho Timor-Leste maibé aumenta. Ami finansia ona husi parte Organizasaun Mundiál Saúde mós apoiu vitima sira violénsia doméstika durante pandemia nia laran no ami mós servisu ho UNICEF hodi forñese fatin fase liman nian no sasán ijiéne seluk tan atu nune’e públiku bele hadok an hosi COVID-19,” nia hateten.

Notísia Relevante :Uniaun Europeia Hakarak Kontribui Dezenvolve Ekonomia TL

Alende ne’e,forñese apoiu sira liuhosi Governu, UE  mós servisu hamutuk ho Sosiedade Sivíl hodi fó tulun ba ema vulneravél sira iha Munisípiu.

Nasaun sira ne’ebe hamahan an iha EU ne’e mós hakarak fó tulun Governu  hodi rekupera ekonomia ne’ebé monu durante mosu coronavirus.

“Ha’u ho Primeiru-Ministru diskute mós kona-ba planu rekoperasaun ekonomia hafoin COVID-19 ne’ebé prepara husi Rui Gomez ho nia kolega sira. Rekoperasaun ekonomia mós sei sai programa prinsipal ba Uniaun Europeia hodi servisu hamutuk  hodi aselera lalais ekonomia iha Timor-Leste,” nia dehan.

Entretantu, foinlalais ne’e, Prezidente Repúblika, Francisco Guterres “Lú Olo”, autoriza ona eis Ministru Planeamentu no Finansas iha VII Governu Konstitusionál Rui Gomes atu lidera ekipa rekoperasaun ekonómika rai laran.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here