DILI, 23 juñu 2020 (TATOLI)- Uniaun Europeia liuhosi ninia Embaxadór iha Timor-Leste (TL), Andrew Jacobs, apela ba povu Timor-Leste atu mantein hodi halo prevensaun ba surtu Corona Virus (COVID-19), tanba moras ne’e sei da’et makaas iha nasaun barak.
Embaxadór Andrew Jacobs hato’o apelu ne’e, hafoin audiénsia ho Prezidente Repúblika, Francisco Guterres Lú Olo, hodi rona direta esplikasaun kona-ba dezenvolvimentu polítiku nasionál no mudansa sira iha Governu Timor-Leste.
“Husu atu kontinua vijilánsia tanba COVID-19 sei moris buras iha nasaun sira seluk. ba povu Timor-Leste atu mantein hodi halo prevensaun ba surtu Corona Virus (COVID-19), tanba moras ne’e sei da’et makaas iha nasaun barak,” dehan Embaxadór Andrew Jacobs ba jornalista sira hafoin hala’o enkontru ho Prezidente Repúblika iha Palásiu Prezidente Nicolau Lobato, Bairru Pité, Dili, tersa ne’e.
Embaxadór Andrew Jacobs kongratula Estadu Timor-Leste tanba susesu iha luta hasoru COVID-19, ho servisu efetivu Governu nian liuhusi Ministériu Saúde, Sentru Integradu Jestaun Krize, PNTL no F-FDTL no apoiu husi Organizasaun Mundiál Saúde foti medidas preventiva no kontrolu COVID-19 ho susesu.
Uniaun Europeia kompremetidu servisu hamutuk ho nasaun sira seluk iha mundu iha luta hasoru COVID-19.
Iha Timor-Leste, Uniaun Europeia apoiu millaun $3 liuhosi Organizasaun Saúde Mundiál no UNICEF ba instalasaun fatin fase liman no sasan ijéniku.
Uniaun Europeia mós sei apoiu tan millaun $3 ba Governu hodi reforsa programa rekuperasaun ekonómiku.
Uniaun Europeia fó apoiu liuhusi Nasoens Unidas hala’o programa Spotlight Initiative. Iha Timor-Leste, Uniaun Europeia aloka osan hamutuk EUR 12 miloens liuhosi UNWOMEN.
Jornalista : Cipriano Colo
Editór : Cancio Ximenes
