Imajen/Mídia PR

DILI, 22 juñu 2020 (TATOLI)–Embaxadór Uniaun Europeia iha Timor-Leste (TL), Andrew Jacobs, hasoru malu ho Prezidente Repúblika, Francisco Guterres Lú Olo, hodi rona direta esplikasaun kona-ba dezenvolvimentu polítiku nasionál no mudansa sira iha Governu Timor-Leste.

Notísia Relevante: Uniaun Europeia Husu Povu TL Mantein Prevene COVID-19

“Ha’u agradese tebes ba sua Exelénsia tanba bele esplika ona mai ha’u kona-ba dezenvolvimentu polítiku rai-laran nia no kona-ba mudansa iha Governu,” dehan Embaixadór Andrew Jacobs ba jornalista sira hafoin hala’o enkontru ho PR, iha Palásiu Prezidente Nicolau Lobato, Beirru Pité, Dili, tersa ne’e.

Durante enkontru ne’, Prezidente Repúblika ho Embaxadór konkorda atu hametin liután parseria entre Uniaun Europeia ho Timor-Leste hodi haburas valor demokrasia, direitu umanu no fiar ba kooperasaun multilateralizmu.

Iha audiénsia ne’e, Prezidente Repúblika no Uniaun Europeia ko’alia kona-ba kooperasaun foun iha área dezenvolviementu ekonómiku durante tinan-hitu, ne’ebé sei hahú iha 2021. Kooperasaun foun ne’e sei foka ba apoiu dezenvolvimentu sustentavel iha área rurál.

Uniaun Europeia fó apoiu  ba dezenvolvimentu iha Timor-Leste durante ne’e, konsentra ba área nutrisaun, kombate deflorestasaun, agrikultura, kombate korrupsaun, hadi’ak finansas públikas, Parlamentu Nasionál, Tribunal Rekursu, boa governasaun, diversifikasaun ekonómiku no desentralizasaun.

Jornalista : Cipriano Colo

Editór        :  Cancio Ximenes

HAKEREK NO HATÁN

Please enter your comment!
Please enter your name here