Xefe UN Women, Sunita Caminha. Foto Tatoli/Egas Cristovão

DILI, 30 juñu 2020 (TATOLI)–Reprezentante UN Women iha Timor-Leste (TL), Sunita Caminha, hateten iha 2020 implementa inisiativa Spotlight ba fulan neen  (jullu-dezembru) iha Timor-Leste ho orsamentu montante millaun $4.28.

Notisia Relevante: SEII-ONU-UE Inaugura Unidade Koordenasaun Ba Inisiativa Spotligth

“Tinan ida-ne’e, inisitaiva spotlight nia planu servisu ho montante totál milliaun $4.28, ba fulan neen nia-laran hodi halo implementasaun ba programa spotlight nian,” dehan Sunita Caminha ba jornalista sira liuhosi serimónia inaugura no reuniaun dahuluk Unidade Koordenasaun ba Inisiativa Spotlight iha salaun SEII Obrigado Barak, Matadoru, Dili, tersa ne’e.

Nia dehan, ativiadade ne’ebé mak atu implementa iha fulan neen nia laran mak halo estudu baze liuliu ho inisiativa spotlight nian no mós halo atividade balun ne’ebé mak halo lansamentu iha munisípiu sira, halo koordensaun ho nivél nasionál no ikus mak sei halo relatóriu ba inisiativa spotlight rasik.

Iha enkontru dahuluk unidade koordenasaun nian, nia hateten, diskute ona kona-ba implementasaun no progresu hosi spotlight iha Timor-Leste hafoin lansa iha fulan marsu 2020, liuhosi hadi’ak no aprova planu anuál servisu iha 2020.

Diskusaun ida-ne’e, nia dehan, ho objetivu ida katak asegura programa ne’e atinje ho impaktu másimu hodi hametin papél xave servisu fornesedór sira iha nivél nasionál, komunidade no iha sistema jestaun ne’ebé koletividade no konsultativu.

“Programa ne’e hala’o hetan suporta hosi ajésnia lima (5) hanesan International Labour Organization (ILO), United Nations Development Programme (UNDP), United Nations Children’s Fund-UNICEF), United Nations Population Fund (UNFPA) no UN Women ne’ebe mak kolabora ho Unidade Asesoria Direitu Umanu, International Organization for Migration (IOM), World Health Organization (WHO) no mós Governu no sosiedade sivíl,” nia informa. 

Iha servisu hamutuk ne’e, nia dehan, atu dezenvolve mensajen sira relasiona ho pandemia COVID-19 inklui ho violénsia hasoru feto no labarik feto sira hodi komesa desimina programa ida-ne’e.

Programa ne’e, tuir nia, implmenta tanba ho nia prinsípiu mak oinsá atu asegura katak iha dever atendementu ba benfisiáriu sira no sira ne’ebé mak fó asisténsia no mós ekipa ne’ebé mak hala’o programa ida-ne’e.

“Ita kontinua buka hodi foka ba sobrevivente nia direitu no labele husik ema ida iha kotuk. Tanba ne’e, halo aprosimasaun ba programa ida-ne’e,” nia hateten. 

Nune’e, nia dehan, tenke halo monitorizasaun hodi aloka ba rekursu ne’ebé eziste relasiona ho asuntu ida-ne’e, atu nune’e ema hotu bele goza nia direitu no mós buka hala’o prosesu ne’ebé mak koletividade no konsultativu atu bele dezenvolve di’ak liután.

Reprezentante UN Women iha Timor-Leste ne’e hateten,  prioridade ida mak tenke kria ekipa tanba esforsu ida atu halakon violénsia presiza tinan barak hodi bele halo mudansa.

“Tanba ita mós rekonese katak forma esforsu ida halakon violénsia iha Timor-Leste ne’ebé mak hala’o tinan barak ona. Entaun, importante hosi inisiativa spotlight ida-ne’e halo mudansa nune’e presiza investe atu kria ekipa fiar aan no mós sente nia mak na’in no ita hotu mak na’in hodi kria inisiativa ba mudansa ne’ebé mak ita sei hala’o hamutuk,” nia dehan. 

Notisia Relevante: Iha Ermera, Violénsia Hasoru Feto no Labarik Feto Sira Purvolta 1000-Resin

Jornalista : Osória Marques

Editór       :  Cancio Ximenes

HAKEREK NO HATÁN

Please enter your comment!
Please enter your name here