Serimónia inaugura no reuniaun dahuluk Unidade Koordenasaun ba Inisiativa Spotlight iha salaun SEII Obrigadu Barak Imajen Tatoli/Osória Marques.

DILI, 30 Juñu 2020 (TATOLI)–Governu liuhosi Sekretária Estadu ba Igualdade no Inkluzaun (SEII) hamutuk ho Koordenadór Rezidente ONU no Embaxadór Uniaun Europeia (UE) ba Timor-Leste inaugura Unidade Koordenasaun iha Timor-Leste ba inisiativa spotlight ho nia membru hamutuk 21. 

Sekretária Estadu ba Igualdade no Inkluzaun (SEII) , Maria Jose da Fonseca Monteiro de Jesus, hatete hanesan estrutura aas Governu nian ba Inisiativa Spotlight iha Timor-Leste, unidade koordenasaun sei fornese lideransa estratéja no superviziona ligasaun vital entre prioridade nasionál, Objetivu Dezenvolvimentu sustentavél (ODS), alineamentu inter-govermentál atu elimina violénsia hasoru feto no labarik feto.

Unidade kooedenasaun ne’e mós, nia dehan, sei asegura involmentu tékniku ajénsia iha planu asaun nasionál violénsia bazeia ba jeneru hodi kontribui ba ezistensia kompromisu nasionál no internasional ne’ebe Timor-Leste kompromitidu atu atinje.

“Govemu Timor-Leste iha kompromisu aas atu hakotu violénsia iha forma saida de’it hasoru feto, labarik-feto no komponente vunerável seluk iha Timor-Leste. Tanba ne’e, presiza involvimentu no apoiu hosi entidade sira hotu inklui ajénsia internasionál no parseiru dezenolvimentu sira. Ha’u apresia tebes ba apoiu hosi UE no servisu hosi parseria hosi ONU liuhosi inisiativa spotlight ida-ne’e. Ita hein katak liuhosi membru 21 hosi Unidade halakon forma oin-oin hosi violénsia hasoru feto no labarik-feto iha Timor-Leste,” dehan Maria Jose da Fonseca Monteiro de Jesus ba jornalista sira liuhosi serimónia inaugura no reuniaun dahuluk Unidade Koordenasaun ba Inisiativa Spotlight iha salaun SEII Obrigadu Barak, Dili, tersa ne’e.

Nia dehan, iha enkontru dahuluk ne’e unidade koordenasaun nian deskuti ona kona-ba implementasaun no progresu hosi spotlight iha Timor-Leste hafoin lansa iha fulan marsu 2020, liuhosi hadi’ak no aprova planu anuál servisu iha 2020.

Diskusaun ida-ne’e, tuir nia, ho objetivu ida atu asegura programa ne’e atinje ho impaktu másimu, hametin papél xafe servisu fornesedór sira iha nivél nasionál no komunidade iha sistema jestaun ne’ebé efetivu.

SEII relata tan partisipante sira mos ko’ala kona-ba sasukat sira ba risku mitigasaun iha kontestu saúde no sósiu-ekonómiku imptime husi krize COVID-19.

Progresu inisiativa Spotlight hirak ne’e, maski ho krize COVID-19 maibé koletivamente hetan elójia hosi membru sira ne’ebé foka no hametin sistema sira ba eliminasaun parseiru íntimu no violénsia doméstika hasoru feto no labarik-feto.

“Ida-ne’e atu promove norma sosiál sira, hasa’e informasaun no asesu atu apoiu servisu sira ba sobrevivente violénsia, hadi’ak disponibilidade no uza dadus ba responde di’ak no involvimentu hamutuk ho sosiedade sivíl sira ba esforsu sira hotu,” nia dehan.

Jornalista : Osória Marques

Editór      :  Cancio Ximenes

HAKEREK NO HATÁN

Please enter your comment!
Please enter your name here