DILI, 24 juñu 2020 (TATOLI)- Ministru Defeza no Ministru Interiór interinu, Filomeno da Paixão de Jesus, fó ona demisaun ba membru Polisia Nasionál Timor-Leste (PNTL) na’in-neen (6) ne’ebé komete iha kazu krime no viola regulamentu dixiplinár PNTL nian.
Notísia Relevante : PNTL Rekomenda Demite Membru Na’in-Ualu, Governu Aprova Na’in-Neen
Membru PNTL sira ne’e hetan demisaun iha semana ne’e nia laran, hafoin parte Komandu PNTL aprezenta prosesu demisaun membru PNTL na’in-ualu (8), maibé iha desizaun ikus hasai de’it membru na’in-neen.
“Membru PNTL na’in-neen ne’e ha’u fó hotu ona demisaun,” afirma Ministru Filomeno Paixão ba jornalista, ohin, iha Palaçio do Governo, Dili.
Kona-ba naran membru sira ne’e, ministru la bele fó sai, tanba desizaun ne’e nia foti bazeia ba karta hosi Komandu PNTL.
Nia dehan, durante ne’e iha membru PNTL barak maka envolve iha kazu inklui la kumpre regra servisu no falta servisu sein iha justifikasaun. Nune’e, ekipa Seksaun Departamentu Justisa PNTL sei kontinua prosesa kazu ne’e hodi aprezenta ba Ministru Interiór atuál Primeiru-Ministru, Taur Matan Ruak, atu bele haree kazu sira-ne’e.
Notísia Relevante : Ministru Interiór Mak iha Kompeténsia Demite Membru PNTL Indixiplina
Jornalista : Eugénio Pereira
Editór : Francisco Simões
