Ministru Defeza, Filomeno da Paixão de Jesus. Imajen/António Gonçalves

DILI, 12 juñu 2020 (TATOLI) – Governu liuhusi Ministru Defeza no Ministru Interiór Interinu, Filomeno Paixão de Jesus, foti ona desizaun  hodi aprova pedidu Konsellu Superiór  Polísia nian hodi  demite membru Polísia Nasionál Timor-Leste (PNTL) na’in-neen (6) ne’ebé komete krime grave.

Notísia Relevante : Komandu PNTL Demite Membru Na’in-Ualu

Antes ne’e, Komandu PNTL liuhusi desizaun Konsellu Superiór Polísia aprezenta ona lista naran membru polísia na’in-ualu (8) ba Ministru Interiór no Ministru Defeza atu foti desizaun hasai sira husi instituisaun, maibé finalmente Ministériu Defeza no Ministériu Interior aprova de’it na’in-neen no na’in-rua seluk haruka fila fali ba Komandu PNTL atu tetu.

“Kona-ba sira-nia prosesu to’o agora sira nain-neen (6) ha’u konsege hetan solusaun atu hasai duni sira husi instituisaun tenke demite no na’in-rua (2) seluk mak komplikadu hodi haruka fila-fali ba komandu polísia hodi haree didi’ak,” informa Ministru Filomeno Paixão, ba jornalista, ohin, iha Palacio do Governo.

Nia hateten, membru PNTL nain-rua (2) ne’ebé haruka fila ba Komandu PNTL tanba ‘faltozu serbisu” barak iha tinan 2010 mai leten, maibé servisu Justisa PNTL dada prosesu to’o agora, tanba ne’e presiza verifika didi’ak fali nune’e bele foti sansaun disiplinár.

Membru PNTL na’in-neen ne’ebé Ministru Filomeno Paixão de Jesus, deside demite tanba komete kazu krime grave hanesan involve iha kazu trajédia Kulu-hun, no ajente polísia ho inisiál JAS ne’ebé lori pistola tiru kanek joven Isac dos Santos iha área Lebukoe, Aldeia Delesuvati, Suku Vaviquini, Postu Administrativu Maubara, Munisípiu Liquiça, iha 30 abríl 2020, inklui sira seluk tan.

“Kona-ba data fiksu atu demite sira ne’e seidauk ,tanba iha prosesu hela maibé semana oin bele fó sai ofisiál ona,” hatetem Ministru Filomeno Paixão de Jesus.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here