iklan

NASIONÁL, POLÍTIKA

Ministru Interiór Mak iha Kompeténsia Demite Membru PNTL Indixiplina

Ministru Interiór Mak iha Kompeténsia Demite Membru PNTL Indixiplina

Komandante Jerál PNTL, Komísariu Faustino da Costa. Imajen/Egas Cristovao

DILI, 18 juñu 2020 (TATOLI)–Komandante Jerál PNTL, Komisariu Faustino da Costa, hateten to’o oras ne’e Ministru Interiór interinu, Filomeno da Paixão de Jesus, seidauk foti desizaun hodi demite membru Polísia Nasionál Timor-Leste na’in-ualu (8), ne’ebé antes ne’e Komandu Jerál aprezenta ona pedidu demisaun tanba kontra regra no indixiplina.

Faustino da Costa hatutan, kona-ba kestaun ida ne’e Ministru Interiór mak iha Kompeténsia atu demite membru hirak ne’e, tanba komandu propoin de’it.

“Antes ne’e Ministru responde ona tanba pedidu hosi Konsellu Superiór Polisia nian. Kestaun ida-ne’e tanba ita ko’alia beibeik kona-ba dixiplina. Regulamentu no dixiplina ne’e komandante Jerál bele bolu superiór sira mai hotu mós, laiha kompeténsia atu demite ema ida. Só komandante hotu mai hamutuk ho Komandante jerál, depois rekomenda de’it ba Ministru no ministru rasik haree no avalia katak rekomendasaun ne’e merese atu hasai ka lae. Tanba ne’e, la’ós komandu jerál mak demite,” dehan Faustino da Costa hodi hatan ba jornalista sira bainhira husu kona-ba asuntu ne’e, hafoin enkontru ho Prezidente Repúblika, Francisco Guterres Lú Olo, iha Palásiu Prezidensiál Nicolau Lobato, Bairrupité, Dili, kinta ne’e.

Faustino hateten, komandu la hola desizaun maibé komandu fó nia rekomendasaun no proposta ba demisaun. Tanba, tuir nia, regulamentu dixiplina la husu atu komandu bele foti kompeténsia dixiplinár hodi halo demisaun.

Antes ne’e, Governu liuhosi Ministru Defeza no Ministru Interiór Interinu, Filomeno da Paixão de Jesus, foti ona desizaun  hodi aprova pedidu Konsellu Superiór  Polísia nian atu demite membru Polísia Nasionál Timor-Leste (PNTL) na’in-neen (6) ne’ebé komete krime grave.

Liga ba asuntu iha leten, antes ne’e mós, Komandu PNTL liuhosi desizaun Konsellu Superiór Polísia aprezenta lista naran membru polísia na’in-ualu (8) ba Ministru Interiór no Ministru Defeza atu foti desizaun hasai sira hosi instituisaun maibé finalmente Ministériu Defeza no Ministériu Interior aprova de’it na’in-neen no na’in-rua seluk haruka fila fali ba Komandu PNTL atu tetu.

Entretantu, membru PNTL nain-rua (2) ne’ebé haruka fila ba Komandu PNTL tanba falta servisu barak iha tinan 2010 mai leten. Servisu Justisa PNTL dada prosesu to’o agora, tanba ne’e presiza verifika didi’ak nune’e bele foti sansaun dixiplinár.

Membru PNTL na’in-neen seluk ne’ebé Ministru Filomeno Paixão de Jesus, deside demite tan-ba komete kazu krime grave hanesan involve iha kazu trajédia Kulu-Hun, no ajente polísia ho inisiál JAS ne’ebé lori pistola tiru kanek joven Isaac dos Santos iha área Lebukoe, Aldeia Delesuvati, Suku Vaviquina, Postu Administrativu Maubara, Munisípiu Liquiça, iha 30 abríl 2020, inklui sira seluk tan.

Jornalista : Cipriano Colo

Editór      :  Cancio Ximenes

iklan
iklan

Leave a Reply

iklan
error: Content is protected !!