Komandante Polísia Munisípiu Baucau, Superintendente Xefe, Armando Monteiro. Imajen Tatoli/Eugénio Pereira

DILI, 22 juñu 2020 (TATOLI)- Komandu Polísia Munisípiu Dili, liuhosi Ekipa Servisu Investigasaun Kriminál Seksaun Forensik (SIK) koordena ona ho ekipa Ospitál Nasionál Guido Valadares (HNGV) hodi halo autópsia ba mate-isin Hendrique Maia Soares, tinan 21, ne’ebé mate iha arredores Universidade da Paz (UNPAZ), domingu madrugada.

Notísia Relevante : UNPAZ Kontaktu Ona Família Matebian Hendrique

Komandante Polísia Munisípiu Dili, Superintendente Xefe, Armando Monteiro, husu ba parte família no parte UNPAZ atu mantein kalma, hodi fó tempu nafatin ba polísia rekolla informasaun husi sasin sira hodi hakotu kazu ne’e.

Komandante Armando dehan, daudaun ne’e parte UNPAZ no família kontinua haksesuk malu kona-ba matebian nia mate no presiza justifikasaun husi rezultadu autópsia hodi bele hatene matebian ne’e monu husi andár leten maka mate ka  hetan torturasaun.

“Ita nia investigasaun la’o daudauk hela, ita esforsu maka’as liuhosi finalidade  investigasaun ida ne’e no hein rezultadu autópsia iha ona maka ita bele deskobre motivu husi akontesimentu ne’e, tanba ita investiga hela provas iha fatin no sasin, inklui sasán sira ne’ebé la’o hamutuk ho matebian,” informa Komandante Armando Monteiro, ohin, ba jornalista liuhosi konferénsia imprensa iha Komandu PNTL, Caicoli, Dili.

Notísia Relevante : Konfrontu UNPAZ, Família Matebian Hendrique Husu Prosesa Tuir Lei

PNTL rasik halo investigasaun iha fatin terrenu nota katak matebian sai husi nia uma hamutuk ho nia kolega sira mak tama ba fatin estajiáriu estudante UNPAZ sira nian.

Armando dehan, iha altura ne’ebá, polísia too kedas fatin akalma sitasaun, inklui evakua kedas estudante na’in-neen (6) ne’ebé sofre kanek tanba hetan agresaun fízika husi grupu balun no evakua mós estudante-100-liu husi UNPAZ ba Komandu Munisípiu Dili.

PNTL mós kaptura no halo identifikasaun ba juventude na’in-lima (5) ne’ebé hamutuk ho matebian tama ba resintu UNPAZ iha tuku 2:00 madrugada, momentu ne’ebá.

“Ita halo ona identifikasaun kona-ba juventude sira ne’ebé hamutuk ho matebian mai iha fatin akontesimentu ho inisiál MS, JS, FM, ACE no MM,” Armando Monteiro informa.

PNTL mós detein hela estudante UNPAZ mane na’in-16 nu’udar sasin ho inisiál, RJCB, JRA, BDJ, CDAG, FC, DI, ABFT, HMA, AMU, MM, LDSDJ, JPJ, AJP, JSJ, JCM no FAM.

PNTL halo mós apreensaun ba sasán evidénsia balun hanesan motorizada-ida lori alkol (tua sabu), no sasán kontra bandu, martelu no besi kanu no ekipamentu eletrónika balun tan ne’ebé PNTL hetan, hafoin konfrontu entre grupu komunidade no estudante iha UNPAZ.

Komandu PNTL mós kontinua fasilita parte família inklui lideransa sira husi UNPAZ hodi buka kria koordenasaun hodi hakotu problema ne’e.

Tuir planu, ohin, ekipa HNGV hala’o ona autópsia no sei entrega mate isin ba  família hodi hala’o serimónia funerál.

Jornalista       : Eugénio Pereira    

Editór             : Francisco Simões

HAKEREK NO HATÁN

Please enter your comment!
Please enter your name here