DILI, 21 juñu 2020 (TATOLI)– Família no inan-rasik husi vítima matebian, Hendrique Maia Soares, tinan 21, ne’ebé monu husi andár leten Universidade da Paz (UNPAZ) husu ba Polísia Nasionál Timor-Leste (PNTL) atu investiga hodi prosesa kazu ne’ebé rezulta nia oan mate tuir lei.

Notísia Relevante : Konfrontu Iha UNPAZ, Na’in-Ida Mate Fatin

Família sira halibur malu iha matebian Hendrique Maia nia uma. Imajen/Eugénio Pereira

Matebian Hendrique Maia Soares, oan dahuluk husi Domingas Soares no Domingos Maia.

Matebian nia aman Domingos  nu’udar membru Polísia Unidade Batallaun Orden Públiku (BOP) husi Munisípiu Ermera durante ne’e hela  iha Aldeia Evaka, Postu Administrativu Don Aleixo, Munisípiu Dili.

Domingas Soares nu’udar inan  triste tebes, bainhira rona nia oan-mane mate tanba monu iha andár leten arredores UNPAZ nian.

“Nu’udar inan laran ne’e moras tebes, ami família ezije atu prosesa kazu ne’e tuir uluk lai lei, kona-ba Reitór dehan, atu rezolve tuir família ne’e ikus, tanba ami la simu ami nia oan mate de’it soe tun hanesan animál, see mak la laran moras no triste tebes,” hateten Domingas Soares ho sentimentu tristeza ba jornalista, ohin, liuhosi konferénsia imprensa iha sira-nia hela fatin Aldeia Evaka.

Familia rasik deskonfia Estudante balun hosi UNPAZ maka halo agresaun fíziku hodi soe tun vítima husi andár leten kuaze metru 12.

Domingas Soares fó sasin katak durante ne’e nia-oan matebian Hendrique Maia nunka ransu arbiru no nunka halo problema arbiru ho kuakér estudante UNPAZ.

“Nia la hatene halo problema, nia tuur de’it iha uma, derrepente maka nia kolega sira halai mai dehan nia mate ona, no nia apa maka halai ba haree loos nia mate ona,” Domingas hateten.

Iha fatin hanesan, Listo de Jesus, nu’udar mós reprezentante família, dehan  sira-nia parte kontaktu ona Magnífiku Reitór UNPAZ, Adolmando Amaral, atu responsabilidade aktu violénsia no krime ne’e.

“Ami kontaktu ona ho lider másimu UNPAZ nian atu responsabiliza ba aktu ne’e, tanba ko’alia kona-ba rezolve tuir dalan família ne’e ikus, tanba kazu krime ne’e tenke rezolve uluk, see mak halo krime tenke kaer prosesa tuir lei,” Listo de Jesus hateten.

Família mós rejeita deklarasaun Reitór UNPAZ kona-ba vítima no nia kolega na’in-tolu mak halo asaltu ba estudante sira iha UNPAZ ne’e laloos. Tanba bazeia ba kronolojia ne’ebé família rekolla katak estudante UNPAZ maka konvida vítima no nia kolega na’in-tolu ba UNPAZ hodi sira hemu tua hamutuk.

“Tuir ami nia hatene, ami nia alin ne’e la’ós estudante, maibé ita lahatene keta nia kolega balun maka konvida nia hodi sira ba hemu tua hodi hamosu konflitu ne’e,” nia hateten.

Daudaun ne’e mate isin sei rai hela iha Mortuáriu Ospitál Nasionál Guido Valadares (HNGV) hodi hala’o autópsia foin bele entrega ba família.

Antes ne’e, Magnífiku Reitór UNPAZ, Adolmando Amaral, klarifika kronolojia kazu ne’e akontese, tanba iha juventude na’in-haat (4) ne’ebé hela besik área UNPAZ halo “asaltu” tama ba arredores UNPAZ.

Adolmando dehan, sira-nia parte mós entrega kazu ne’e ba Komandu PNTL hodi halo investigasaun kle’an no prontu rezolve kazu tuir dalan família no tuir lei.

“Ita hein rezultadu investigasaun hotu, Universidade da Paz bele rezolve problema ho família tuir dalan família nian ka dalan legál,” nia hateten.

Adolmando mós rejeita informasaun kona-ba estudante sira hemu tua maka provoka situasaun, nu’udar informasaun ne’ebé laloos no nia parte mós rejeita la’ós estudante sira maka oho vítima ne’ebé mate.

Too notísia ne’e hatún, Agência Tatoli tenta konfirma ba Komandante Polísia Munisípiu Dili, Superintendente Xefe, Armando Monteiro, maibé seidauk bele fó esplikasaun, tanba sei hein rezultadu investigasaun husi ekipa Polísia Eskuadra Ai-mutin.

Tuir observasaun Agência Tatoli, iha fatin akontesimentu hatudu polísia Unidade BOP no Task Force halo seguransa maka’as hodi evita problema entre família no estudante sira.

Jornalista       : Eugénio Pereira

Editór             : Francisco Simões

HAKEREK NO HATÁN

Please enter your comment!
Please enter your name here