Deputada CNRT, Carmelita Caetano Moniz. Imajen/dok.TATOLI

DILI, 18 juñu 2020 (TATOLI)—Membru Komisaun A (Justisa no Konstitusionál), Deputada Carmelita Caetano Moniz, husu Governu liuhosi Ministru Justisa (MJ), Manuel Cárceres, kriminaliza mak kazu insestu la’ós prioritiza difamasaun.

Notísia Relevante: PM Taur Fó Tempu ba Sosiedade Diskute Lei Kriminaliza Difamasaun

“Ha’u-nia pontu de vista di’akliu se altera Kódigu Penál entaun ita kriminaliza uluk mak kazu insestu la’ós kriminaliza difamasaun. Razaun hanesan ne’e difamasaun krime ka la krime depende ba ema-ida hato’o opiniaun ka halo difamasaun ne’e. Se nia halo difamasaun ho nia prepozitu para hatún ema-nia karáter publikamente no hatún ema-nia karáter ho asasinatu, ne’e ita bele dehan krime seráke ida-ne’e razoável. Maibé, se  ema-ne’e hato’o buat ida publikamente maibé ba hahalok ida-ne’ebé ke loos,” Deputada Carmelita Caetano Moniz informa ba jornalista sira iha resintu Parlamentu Nasionál, kinta ne’e.

Eis Prezidente Komisaun A ne’e fó ezemplu, jornalista sira kuandu hakerek buat ida ne’ebé loos la hetan prosesu kriminál.

Notísia Relevante: Esbosu Lei Kriminaliza Difamasaun Labele “Viola” Prinsípiu Konstitusionál

“Ne’ebé, ba ha’u tempu ida agora ita atu kriminaliza difamasaun ne’e la’ós opurtunu, la nesesáriu no laiha razaun de ser. Di’ak liu ita haree no tetu didi’ak lai tanba ita país Repúblika Demokrátika Timor-Leste, ne’ebé ita tetu didi’ak ita-nia hanoin polítka sira hodi sai ba lei,” Deputada CNRT fó hanoin ba Ministru Justisa, Manuel Cárceres.

Deputada Carmelita Caetano Moniz preokupa ho polítika Ministru Justisa nian atu kriminaliza difamasaun iha tempu hanesan.

“Ita-nia prioridade mak saida. Ita sente katak altera Kódigu Penál ho kriminaliza difamasaun ne’e mak mais prioridade duké outros. Ba ha’u, tau prioridade karik ita kriminaliza mak insestu. Karik, tanba kazu insestu ne’e barak barak tebes iha Timor. Iha tribunál ita haree kazu insestu barak tebes,” nia dehan. 

Eis Prezidente Komisaun A ne’e, loloos ne’e prioritiza kazu sira-ne’ebé prosesu la’o ona iha tribunál sira, liuliu kazu insestu.

Notísia Relevante: CI Konsidera Lei Kriminaliza Difamasaun Kontra Espíritu Konstituisaun RDTL

Jornalista : Evaristo Soares Martins

Editór      :  Cancio Ximenes

HAKEREK NO HATÁN

Please enter your comment!
Please enter your name here