Prezidente Komisaun A (Justisa no Konstitusionál), Joaquim dos Santos ‘Boraluli’. Imajen Tatoli/Egas Cristóvão

DILI, 17 juñu 2020 (TATOLI)—Prezidente Komisaun A, Deputadu Joaquim dos Santos, informa Komisaun A (Justisa no Konstitusionál) iha Parlamentu Nasionál aprova ona kalendáriu kontinuasaun debate Lei Antí Korrupsaun (LAK) ba semana oin.

Notísia Relevante: Aniceto Guterres Fó Orientasaun Ba Komisaun A Aselera LAK

“Ohin. aprova ona ami-nia kalendáriu no semana oin ami komesa loke debate iha faze espesialidade ba Lei Antí Korrupsaun,” Prezidente Komisaun A, Deputadu Joaquim dos Santos, informa ba Agência TATOLI iha Parlamentu Nasionál, kuarta ne’e.

Nia haktuir, iha tempu Deputada Carmelita Caetano Moniz lidera Komisaun A aprova tiha ona artigu 22 iha dispozisaun jerál.

“Agora seidauk aprova mak parte kriminál no prevensaun ninian, ne’e atu diskute iha fulan ida-ne’e nia laran. Se la hotu, ita sei kontinua. Se hotu, di’ak liután. Agora sei iha artigu 94 ida hanesan ne’e, dalaruma ami atu ba konsentra iha fatin ruma, fatin seidauk hatene, depois mak sei fó-sai ba públiku tanba redasaun sira preparadu hotu ona,” nia hateten. 

Prezidente Komisaun A ne’e fó-sai katak, sei nafatin halo audiénsia públika ho órgaun kompetente sira hanesan Komisaun Antí Korrupsaun (KAK), PSIK, Ministériu Justisa no organizasaun sosiedade sivíl sira-ne’ebé interese ba matéria ne’e.

“Bele fó opiniaun depois deputadu sira aprova. Lejislatura ida-ne’e atu hotu ona iha 15 jullu. Purtantu 15 jullu bá-oin ne’e resesu, ita haree took sé deputadu sira hakarak serbisu iha resesu entaun di’ak liután,” nia dehan. 

Deputadu Joaquim dos Santos, hateten debate ne’e sei akontese iha loron kuarta, kinta no sesta, semana oin.

Notísia Relevante: Deputadu Adriano Husu Komisaun A Konsidera Ajenda Debate Projetu LAK

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here