Ohin Prezidente Parlamentu Nasionál Eleitu, Aniceto Guteres Hahu Reuniaun Lider Bankada Iha Parlamentu Nasionál. Imajen /Egas Cristóvão

DILI, 21 maiu 2020 (TATOLI)—Prezidente Parlamentu Nasionál, Aniceto Guterres, liuhosi reuniuan líder bankada sira atu fó orientasaun ba Komisaun A (Justisa no Konstitusionál) atu aselera kontinuasaun debate Lei Antí Korrupsaun (LAK).

“Kona-ba Lei Antí Korrupsaun ne’e mós, ohin, ha’u fó hanoin hotu hodi fó orientasaun ba Komisaun Espesializada, liuliu Komisaun A (Justisa no Konstitusionál) atu aselera Lei Antí Korrupsaun ne’e,” dehan Aniceto Guterres ba jornalista sira iha Parlamentu Nasionál, kinta ne’e.

Prezidente Parlamentu Nasionál ne’e hateten, destinu Lei Antí Korrupsaun ne’e sei maioria deside entaun bele aprova tanba desizaun iha parlamentu ne’e depende ba maioria, la’ós prezidente  mak determina.

“Ha’u reprezenta votu ida de’it. Ha’u-nia desizaun ne’e kualkér deputadu bele rekorre ba plenária,” hateten Prezidente Parlamentu Nasionál, Aniceto Guterres.

Antes ne’e, diskusaun Lei Antí Korrupsaun ne’e to’o ona artigu 22 no junta tán ho estudu komparativu Macau nian hodi halo ajustamentu iha kontinuasaun debate  ba lei refere.

Notísia Relevante: Kinta Lejizlatura Sei Finaliza Lei Antí Korrupsaun

Jornalista : Evaristo Soares Martins

Editór       : Cancio Ximenes

HAKEREK NO HATÁN

Please enter your comment!
Please enter your name here