DILI, 15 juñu 2020 (TATOLI)–Primeiru-Ministru (PM), Taur Matan Ruak, entrega ona lista kandidatu Membru Governu (MG) na’in-19 iha Gabinete Prezidente Repúblika (PR), Francisco Guterres “Lú Olo”, hodi hein kalendáriu serimónia pose.
Notísia Relevante: Xefe Estadu Husu Membru Governu Foun Komprende Kbiit Laek Sira-Nia Hakarak
“Lista membru Governu foun sira iha ona gabinete Prezidente Repúblika nian. Oras ne’e, ita hein de’it atu marka loron ba serimónia pose. Daudaun ne’e, iha lista ne’ebé mak ami hatama ba Gabinete Prezidente Repúblika iha na’in-19,” Primeiru-Ministru, Taur Matan Ruak, hato’o asuntu ne’e ba jornalista sira hafoin hala’o enkontru semanál ho Prezidente Repúblika iha Palásiu Prezidente Nicolau Lobato, Bairru Pité, Dili, segunda ne’e.
Kona-ba lista no mós membru sira ne’ebé simu ona pose, Taur hateten, laiha kestaun dezekelibriu tanba oras ne’e Governu ida ne’e iha de’it forma ida atu halo esforsu hodi konsolida koligasaun ba estabilidade governativa.
Iha biban hanesan, jornalista sira konfirma ho Xefe Kaza Sivíl Prezidénsia Repúblika, Francisco Maria de Vasconcelos, kona-ba lista ne’ebé Primeiru-Ministru aprezenta ona, Vasconlcelos rekoñese duni lista iha ona gabinete maibé hanesan xefe kaza sivíl seidauk bele ko’alia ba públiku tanba Prezidente Repúblika seidauk dekreta.
“Lista iha ona gabinte maibé ha’u seidauk bele ko’alia tanba Prezidente Repúblika seidauk dekreta. Bainhira Prezidente Repúblika dekreta ona mak ha’u bele ko’alia,” dehan Xefe Kaza Sivíl hodi la fó sai lista membru Governu sira nian.
Notísia Relevante: PM Otimista Prezensa Membru Governu Foun Haforsa VIII Governu
Antes ne’e, Prezidente Repúblika Francisco Guterres “Lú Olo”, fó pose ba membru foun VIII Governu Konstitusionál hamutuk na’in-ualu iha loron 29 maiu 2020.
Ministru sira ne’ebé simu pose mak hanesan, Vise Primeira-Ministra Armanda Berta dos Santos, Ministru ba Prezidénsia Konsellu Ministru Fidelis Manuel Leite Magalhāes, Ministru ba Assuntu Parlamentares no Komunikasaun Sosiál, Francisco Martins da Costa Perreira Jerónimo, Ministru Finansas Fernando Hanjam, Ministru Administrasaun Estatál Miguel Pereira de Carvalho, Ministra Saúde Odete Maria Freitas Belo, Ministru ba Assuntu Kombatentes Libertasaun Nasionál Júlio Sarmento da Costa ‘Meta Mali’, Ministru Agrikultura no Peskas Pedro dos Reis.
Iha 25 maiu, Prezidente Repúblika promulga Lei Orgániku foun VIII Governu Konstitusionál mak Primeiru Ministru sei koajuva hosi Vise Primeiru-Ministru na’in-rua. Kada Vise Primeiru-Ministru ida sei akumula funsaun Ministru Planu no Ordenamentu no Ministru Solidariedade Sosiál no Inkluzasaun.
Ministru sira ne’ebé sei integra ba VIII Governu Konstitusionál mak Ministru da Prezidénsia Konsellu Ministru, Ministru Koordenadór ba Assuntu Ekonómiku, Ministru ba Assuntu Parlamentar no Komunikasaun Sosial, Ministru Finansas, Ministru Negósiu Estranjeiru no Kooperasaun, Ministru Justisa, Ministru da Administrasaun Estatal, Ministru Saúde, Ministru Edukasaun Juventude no Desportu, Ministru Ensinu Superiór, Siénsia no Kultura, Ministru Solidariedade Sosiál no Inkluzasaun, Ministru ba Assuntus Kombatentes Libertasaun Nasionál, Ministru Planu no Ordenamentu, Ministru Obras Públikas, Ministru ba Transportes no Komunikasaun, Ministru Turizmu, Komérsiu no Indústria, Ministru Agrikultura no Peskas, Ministru Defeza, Ministru Interiór, Ministru Petróleu no Minerais.
Ministru sira sei koajuva hosi Vise-Ministru Negósius Estranjeiru no Kooperasaun, Vise-Ministru Justisa, Vise-Ministru Estatál, Vise-Ministru ba Kuidadu Saúde Primária, Vise-Ministru ba Dezenvolvimentu Estratéjiku Saúde, Vise-Ministru Edukasaun, Juventude no Desportu, Vise-Ministru Solidariedade Sosiál, Vise-Ministru Obras Públikas, Vise-Ministru ba Turizmu Komunitária no Kulturál, Vise-Ministru Komérsiu no Indústria, Vise-Ministru Interiór.
Aleinde ne’e, iha Sekretáriu Estadu Kooperativa, Sekretáriu Estadu ba Ambiente, Sekretáriu Estadu ba Komunikasaun Sosiál, Sekretáriu Estadu ba Teras no Propriedades, Sekretáriu Estadu ba Juventude no Desportu, Sekretáriu Estadu Arte no Kultura, Sekretáriu Estadu ba Assuntus Kombatentes Libertasaun Nasionál, Sekretáriu Estadu ba Peskas, Sekretáriu Estadu ba Protesaun Sivíl no Sekretáriu Estadu ba Igualdade no Inkluzaun.
Notísia Relevante: Diskursu Prezidente Repúblika iha Tomada Pose ba Membru Foun VIII Governu Konstitusionál
Jornalista : Cipriano Colo
Editór : Cancio Ximenes