DILI, 29 maiu 2020 (TATOLI)–Prezidente Repúblika (PR) Fracisco Guterres “Lú Olo” husu ba membru Governu na’in-ulau (8) ne’ebé foin simu pose atu servisu ho haraik-aan no buka komprende saida mak sidadaun sira liuliu kb’it laek sira-nia hakarak.

Notísia Relevante: Meta Malik : “Ha’u Mai Kompleta Restu Mandatu hosi Governu AMP”

“Simu knaar nu’udár membru Governu, signifika simu mós responsabilidade boot ida. Iha tempu susar ne’ebé de’ it, ha’u hein katak membru governu mak sakrifika-aan uluk no dada ema atu  servisu maka’as, hatene oinsá  haraik-aan hodi rona no komprende saída mak ita-nia sidadaun sira hakarak, liuliu sira ne’ebé kbiit la’ek. Importante tebes hatán ba sira-nia hakarak,” Xefe Estadu husu ida-ne’e liuhosi diskursu iha serimónia pose ba membru Governu na’in-ualu iha Palásiu Prezidensiál Nicolau Lobato, Bairru Pité, Dili, sesta ne’e.

Aman nasaun ne’e mós hato’o saudasaun espesiál ba membru governu foun ne’ebé foin simu pose no aproveita okaziaun ida-ne’e hodi hato’ o saudasaun espesiál ba membru Governu sira seluk.

“Ba VIII Governu ha’ u hato’o ha’u-nia votu atu halo servisu di’ak no susesu ba Timor-Leste ida di’ak liután,” nia hato’o.

Xefe estadu mós fó hanoin katak nasaun Timor-Leste, oras ne’e daudaun tau atensaun liuliu ba luta hasoru vírus Corona ka COVID-19. Tanba ne’e, sidadaun hotu no nasaun ida-idak luta hasoru moras ne’e no luta ida-ne’e hala’o iha mundu tomak.

“Ita tenke konsiente katak pandemia ida-ne’ e afeta mundu tomak. COVID-19 hada’et  ona ba ema besik tokun neen no hamate ona ema besik  rihun atus haat. Maibé, to’o agora, laiha ema ida, nein komunidade sientífika, bele prevee bainhira mak pandemia ne’ e hotu,” nia hateten.

Iha Timor-Leste, nia dehan, Estadu no sosiedade fó liman  ba malu hodi kombate kalamidade públika ida-ne’e.

“Ho partisipasaun hotu-hotu nian, ita konsege duni evita moras COVID-19 hada’ et ba komunidade no nune’ e ema ida lamate ho moras ne’e iha ita-nia rain,” PR Lú Olo rekoñese.

Notísia Relevante: Francisco Jerónimo Promete Asume Kargu Ministru ho Responsabilidade

Governu, Gabinete Integradu Jestaun Krize no entidade oin-oin hasai medida prevensaun no kontrolu, tanba sidadaun sira kumpre no konsege kontrola kalamidade naturál mosu ho pandemia ida-ne’ e.

Ohin liu tiha loron 60 ho estadu emerjénsia, nia hateten, TL bele haree katak sidadaun hotu nia luta atu hasees-aan no kontrola virus corona no atu hadi’ak kondisaun tratamentu, hatudu daudaun ona rezultadu di’ ak  iha nível nasional.

Nune’ e, nia dehan,  buka atu no sei  hala’o nafatin luta ne’e maibé hamenus dadaun ona medida sira, biar ita ida-idak tenke matan-moris liután no haktuir nafatin rekomendasaun fase liman beibeik, uza máskara no halo distánsia sosiál.

“Ita to’ o ona situasaun ida ne’ebé ita hatene ona katak luta ne’e ninia susesu iha ita-nia liman. Katak hamutuk ho komunidade internasionál, ita sei konsege halakon kalamidade hosi virus corona. Tanba ne’e duni, ha’ u fó parabéns ba ita-nia Povu, ha’u hato’ o saudasaun espesiál  ba Primeiru-Ministru, ba ilustre deputadu sira, ba profisionál sira iha liña oin, ba konfisaun relijioza sira no sira-nia  lideransa sira no mós ba sosiedade sivíl.  Ita konsege duni, ho forma konsiente no responsável, sátan vírus korona hada’et, liuhosi asaun konjunta, unida, koordenada, forte no efikáz,” Xefe estadu fó parabens.

Entretantu, Prezidente Repúblika fó pose ba membru governu na’in-ualu (8) ne’e, liuhosi Dekretu Prezidente, númeru 39/2020, hafoin nomeia Vise Primeira-Ministra Armanda Berta dos Santos, Ministru ba Prezidénsia Konsellu Ministru Fidelis Manuel Leite Magalhāes, Ministru ba Assuntu Parlamentares no Komunikasaun Sosiál , Francisco Martins da Costa Perreira Jerónimo, Ministru Finansas Fernando Hanjam, Ministru Administrasaun Estatal Miguel Pereira de Carvalho, Ministra Saúde Odete Maria Freitas Belo, Ministru ba Assuntu Kombatentes Libertasaun Nasionál Júlio Sarmento da Costa ‘Meta Malik’, Ministru Agrikultura no Peskas Pedro dos Reis.

Serimónia tomada posse ba membru foun VIII Governu na’in-ualu (8) nian hala’o iha Palásiu Prezidensiál Nicolau Lobato, tuku 10.

Marka prezensa iha serimonia pose ne’e, Prezidente Parlamentu Nasionál Aniceto Guterres, Prezidente Tribunál Rekursu, Deolindo dos Santos, Primeiru Ministru Taur Matan Ruak, deputadu sira, membru atuál oitavu governu, eis primeiru Ministru Mari bim Amude Alkatiri, korpu diplomátiku sira, Xefe Estadu Maiór Jenerál F-FDTL, majór Jenerál Lere Anan Timur, Komandante Jerál Polisia Nasionál Timor Leste, komisáriu Faustino da Costa, Padre Jovito do Rego,  Familia, no konvidadu sira seluk.

Notísia Relevante: Aban, Xefe Estadu Fó Pose Ba Membru Governu Na’in-Ualu

Jornalista : Cipriano Colo

Editór       : Cancio Ximenes

HAKEREK NO HATÁN

Please enter your comment!
Please enter your name here