Primeiru Ministru,Taur Matan Ruak.Imajen/Antonio G

DILI, 29 maiu 2020 (TATOLI)–Primeiru Ministru (PM), Taur Matan Ruak, otimista ho prezensa membru Governu foun na’in-ualu (8) ne’ebé Prezidente Repúblika, Francisco Guterres “Lú Olo” fó pose ne’e sei haforsa liután VIII Governu Konstitusionál, perante dezafiu oin-oin ne’ebé iha.

Xefe Governu ne’e hatutan, ho membru Governu na’in-ualu (8) ne’e nia prezensa, sei responde ba dezafiu sira ne’ebé Timor-Leste enfrenta durante ne’e.

“Ohin, VIII Governu kompleta tan ho membru na’in-ualu (8). Ida ne’e, fó pasu ida katak servisu ba oin sei di’ak. Ha’u fiar katak ho membru hirak ne’e nia prezensa, sei servisu hodi responde dezafiu ne’ebé ita hotu-hotu enfrenta,” dehan Primeiru Ministru (PM), Taur Matan Ruak, liuhosi diskursu iha serimonia pose ba membru Governu na’in-ualu (8)  iha Palásiu Prezidensiál Nicolau Lobato, Bairru Pité, Dili, sesta ne’e.

Lider másimu VIII Governu ne’e deklara, Governu ne’ebé nia lidera sempre nakloke ba diálogu liga ba planu hotu ne’ebé bele kontribui ba dezenvolvimentu rai-ne’e nian liuliu ba povu nia moris di’ak.

Entretantu, membru Governu foun na’in-ualu (8) ne’ebé Prezidente Repúblika fó pose mak hanesan Vise Primeira-Ministra Armanda Berta dos Santos, Ministru ba Prezidénsia Konsellu Ministru Fidelis Manuel Leite Magalhāes, Ministru ba Assuntu Parlamentares no Komunikasaun Sosiál, Francisco Martins da Costa Perreira Jerónimo, Ministru Finansas Fernando Hanjam, Ministru Administrasaun Estatal Miguel Pereira de Carvalho, Ministra Saúde Odete Maria Freitas Belo, Ministru ba Assuntu Kombatentes Libertasaun Nasionál Júlio Sarmento da Costa ‘Meta Mali’, Ministru Agrikultura no Peskas Pedro dos Reis.

Marka prezensa iha serimónia pose ne’e, Prezidente Parlamentu Nasionál Aniceto Guterres, Prezidente Tribunál Rekursu, Deolindo dos Santos,  deputadu sira, membru atuál oitavu governu, eis primeiru Ministru Mari bim Amude Alkatiri, Xefe Estadu Maiór Jenerál F-FDTL, majór Jenerál Lere Anan Timur, Komandante Jerál Polísia Nasionál Timor Leste, komisáriu Faustino da Costa, Padre Jovito do Rego,  Familia, no konvidadu sira seluk.

 Jornalista : Cipriano Colo

Editór         : Cancio Ximenes

HAKEREK NO HATÁN

Please enter your comment!
Please enter your name here