Prezidente RAEOA-ZEESM,TL emposadu, Arsenio Paixão Bano. Imajen Tatoli/Egas Cristovão

DIILI, 15 juñu 2020 (TATOLI)–Prezidente Autoridade (PA) Rejiaun Administrasaun Espesiál Oé-Cusse Ambeno (RAEOA), Arsenio Paixão Bano, husu ba Ministériu Solidaridade Sosiál no Inkluzaun (MSSI) atu no tenke aselera lalais pagamentu subsídiu $200 ba benefisiáriu sira iha RAEOA.

 Notísia Relevante: PA Arsénio Bano Promete Semana Oin Rezolve Subsídiu Uma-Kain Iha Oé-cusse

“Ohin, ha’u hasoru señora Ministra Solidaridade Sosiál no Inkluzaun atu husu ajuda hodi aselera pagamentu subsídiu $200 ba ha’u-nia povu Oé-cusse tanba sira mós hein kleur ona,” dehan Arsenio Paixão Bano ba jornlaista sira hafoin hasoru malu ho MSSI iha salaun MSSI, Caicoli, Dili, segunda ne’e. 

Prezidente RAEOA ne’e hatutan, iha semana ne’e ho semana oin tenke halo preprasaun no sosializasaun ba formasaun oinsá halo pagamentu iha RAEOA.

“Hau hakrak hatete katak ha’u kontente tebes hasoru ministra atu aselera pagamentu ida ne’e ba semana ne’e no semana oin, atu halo sosializsaun no preparativu ba pagamentu ba Oé-cusse nian,” nia dehan. 

Kontas ne’ebé mak Oé-Cusse asentu iha nasionál hotu ona, tuir nia, ekipa boot no forte hosi MSSI atu tún halo pagamentu dala ida la presiza halo dala rua.

Notísia Relevante: MF Kontinua Koordena Ho MSSI ba Pagamentu Subsídiu Uma-Kain RAEOA

Bainhira halo pagamentu, nia informa, aviaun ZEEMS labele la’o tanba sei iha problema téknika hodi rezolve.

“Se aviaun ZEEMS la’o karik, ha’u ofisiálmente konvida Vise Primeiru-Ministra atu ba akompaña diretamente ba haree Oé-Cusse,” nia hateten. 

Nia dehan, Oé-Cusee tenke fiksu simu pagamentu subsídiu $200, atu nune’e povu labele haree de’it iha televizaun, povu hosi munisípiu seluk simu ona maibé pvu Atoni tenke simu ona osan.

“Lakohi hein kleur pagamentu subsídiu $200. Semana oin, bele halo ona transferénsia osan ba konta bankária PNDS suku nian, atu bele halo ona pagamentu. Se transfere ba seluk entaun kleur tan,” nia haktuir.

Entretantu, Diretór Jerál MSSI, Rui Manuel Gago Exposto, hatete totál família uma-kain iha RAEOA purvolta 20.000 ho montante orsamentu ne’ebé mak selu mak $4.000.000.

“Osan ne’ebé mak aloka ba RAEOA hamutuk $4.000.000 hodi selu ba benefisiáriu sira purvolta 20.000,” nia informa. 

Notísia Relevante: Molok Pagamentu, Autoridade RAEOA Sei Loke Uluk Konta Bankária ba Kada Suku

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here