Prezidente Autoridade RAEOA-ZEESM,TL, Arsénio Paixão Bano. Imajen Tatoli/António Gonçalves

DILI, 12 juñu 2020 (TATOLI) – Prezidente Autoridade (PA) Rejiaun Administrativu Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM,TL), Arsénio Paixão Bano, promote semana oin sei rezolve dadus ba uma-kain sira iha Oé-cusse atu populasaun sira bele hahú simu ona subsídiu apoiu monétariu husi Estadu ba fulan-rua ho montante $200.

Oé-cusse oan sira nonton de’it ema simu subsídiu $200. Tanba ne’e, ha’u ho ekipa sei fó prioridade, iha semana oin ami tenke rezolve dadus pendente ka dadus la kompletu atu semana rua tan Oé-cusse mós bele simu subsídiu ne’e,” tenik PA RAEOA iha Palásiu Governu, sesta ne’e.

Notísia Relevante: MF Finaliza Transferénsia Millaun $59,6 ba Uma-Kain 298.119, La Inklui RAEOA

Nia dehan, tanba foin simu pose maka nia rasik seidauk hatene razaun saida maka Oé-cusse seidauk simu subsídiu, maibé prontu atu koopera ho ministériu sira atu rezolve asuntu ne’e ho sériu no lalais.

“Segunda oin ha’u sei ba Vise Primeira-Ministra no Ministra Solidaridade Sosiál no Inkluzasaun atu rezolve subsídiu uma-kain ba RAEOA nian,” nia promete.

Antes ne’e, Xefe Gabinete Prezidente Autoridade RAEOA, Silvério Pinto Baptista, hateten prosesu pagamentu ba RAEOA bele akontese iha loron 20 ba leten tanba ekipa ne’ebé halo pagamentu dezloka ona ba munisípiu 12 hodi halo pagamentu.

Nia esplika, tuir kalkulasaun pagamentu iha RAEOA sei presiza tempu entre loron 10 de’it tanba númeru benefisiáriu iha família 20.000 resin, maski iha despaisu ba pagamentu ne’e sei hala’o entre loron 10 to’o loron 14 juñu.

Nia simu ona informasaun husi parte Diretór Jerál MSSI katak osan ne’e alokadu ona maibé RAEOA mak tenke prepara buat rua hanesan númeru konta bankária husi Banco Nacionál Comércio Timor-Leste (BNCTL) no mós prepara brankas.

Autoridade RAEOA hasai ona despaisu ida ba Diretora Finansas RAEOA atu fasilita prosesu loke númeru konta bankária no agora prosesu ne’e kontinua la’o.

Ho ida-ne’e maka iha konkordánsia katak Autoridade sei haruka karta ida ba Ministériu Administrasaun Estatál atu husu autorizasaun, nune’e autoridade bele uza de’it númeru konta bankária husi Programa Nasionál Dezenvolvimentu Suku (PNDS) nian, ne’ebé antes ne’e kada suku iha RAEOA iha ona.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here