Ministru Finansas, Fernando Hanjam. Imajen Tatoli/Egas Cristovão

DILI, 15 juñu 2020 (TATOLI) – Maski Ministériu Solidariedade Sosiál no Inkluzaun (MSSI) kuaze konklui pagamentu iha munisípiu 12 maibé seidauk realiza pagamentu iha Rejiaun Administrativa Espesiál Oé-cusse Ambeno (RAEOA), tanba ne’e Ministériu Finansa (MF) kontinua halo koordenasaun ho MSSI hodi halo pagamentu subsídiu uma-kain iha Rejiaun Oé-cusse ne’ebé seidauk realiza.

“Kona-ba dadus uma-kain iha RAEOA, ami koordena hela ho Ministériu Solidariedade Sosiál no Inkluzaun tanba sira mak tenke relata ba Ministériu Finansa hodi verifika loloos no halo pagamentu, tanba ne’e ami hein de’it lista”, hateten Ministru Finansa, Fernando Hanjam iha Palásiu Governu hafoin hasoru Primeiru-Ministru, Taur Matan Ruak, segunda ne’e.

Notísia Relevante: PA Arsénio Bano Promete Semana Oin Rezolve Subsídiu Uma-Kain Iha Oé-cusse

Loron Dalimak, Ekipa Pagamentu Selu Ona Benefisiáriu Hamutuk 148.875

Fernando Hanjam dehan, MF labele diretamente koordena ho autoridade RAEOA maibé ho MSSI.

MF rasik seidauk simu lista husi MSSI relasiona ho dadus uma-kain hosi RAEOA, maibé antes ne’e Vise-Ministra Finansa, Sara Lobo Brites informa bainhira dadus ne’e simu kompletu sei iha uma-kain hamutuk 20.000 resin maka simu, ne’ebé korresponde ho millaun $4, ne’ebé korresponde ho pagamentu fulan-rua hamutuk $200 ba kada uma-kain.

Daudaun ne’e, MSSI kuaze konklui ona pagamentu ba uma-kain iha munisípiu 12 hamutuk 298.119, la inklui RAEOA ho totál orsamentu hamutuk $59.623.800, ba pagamentu $200 ba kada uma-kain.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here