Xanana Gusmão fó apoiu ai-han báziku ba populasaun kbiit-laek sira. Imajen/Eugénio Pereira

METINARO 12 juñu 2020 (TATOLI)- Lider Karizmátiku, Kay Rala Xanana Gusmão,  hamutuk ho intelektuál no emprezáriu Timoroan balun kontinua la’o tama-sai munisipiu, postu administrativu, suku to’o aldeia sira, hodi halo asaun karidade ba populasaun kbiit-laek sira.

Notísia Relevante : Kbiit-Laek 193 Simu Apoiu no Agradese ba Xanana

Ba dala-ida ne’e, Xanana dezloka Munisípiu Manatuto, hodi halo asaun solidariedade hodi fahe foos, mina bimoli, supermi ho nesesidade báziku seluk tan ba komunidade kbiit-laek hamutuk família uma-kain-100 iha Postu Administrativu Metinaro, Munisípiu Dili ho uma-kain 100 iha Aldeia Hatumetak Ilimanu, Suku Uma Kaduak, Postu Administrativu Laclo, Munisípiu Manatuto.

Xefe Suku Mantelolão, Sergio Assis Lopes Sarmento Dias, hato’o agradese ba apoiu ne’e tanba bele tulun direita maluk sira ne’ebé presiza tebes iha situasaun estadu emerjensia.

“Onra ba avó Nana (Xanana, red) bele mai too ami nia fatin, avó hatudu nia domin, lalika haree ba sasán sira ne’e, maibé ninia domin maka mai too iha ne’e haree direita ami-nia problema,” afirma Sergio Assis Lopes.

Nia dehan, povu agradese tebes ho apoiu ne’e, tanba Suku Mantelolão nu’udar suku foun ida, ne’ebé primeira vés maka hetan vizita husi Xanana Gusmão.

Notísia Relevante :  Defisiénsia no Kbiit-Laek Simu Apoia Ai-han husi Xanana ho Key

Iha oportunidade ne’e, xefe suku aprezenta mós problema ne’ebé povu enfrenta hanesan, estrada aat no komunidade iha área refere too agora seidauk asesu ba liña eletrisidade.

Xefe suku ne’e mós husu ba Xanana atu fó apoiu kadeira tau iha uma kapela ne’ebé harii ona, inklui ajuda ekipamentu desportu nian ba joven sira.

Iha fatin hanesan, avó-feto, Isabel C. Soares, hato’o agradese ba apoiu ai-han ne’ebé oferese direita husi lider nasionál ne’e.

Iha fatin hanesan, Xanana Gusmão mós agradese foin primeira vés bele vizita povu Mantelolão, hodi haree direita problema báziku ne’ebé povu sira hato’o no promete sei hato’o ba governu hodi buka rezolve.

Xanana dehan, iha periodu Estadu Emerjénsia nia halo vizita ba munisípiu sira hodi apoia ai-han haree ferik no katuas barak presiza duni alimentasaun.

“Ama ho apa-sira, no bei-oan sira, primeira vés mak ha’u mai iha ne’e ho haksolok duni, ha’u ba too Suai, Ainaro no fatin seluk tan, katuas no ferik sira barak loos, ha’u la iha servisu, maibé imi nia prioridade maka estrada, ahi la iha ne’e neineik Governu sei tau matan,” Xanana hateten.

Nia hatutan, iha fatin barak mós joven sira hahú organiza koopera ho empreza barak halo asaun karidade nu’udar asaun importante ida atu tulun povu sira iha situasaun importante ne’ebé povu presiza tebes Governu no ema hotu nia apoiu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here