Xanana Gusmão hakne’ak hodi simu oferta tais ne’ebé tara husi Tirja Xavier iha Aldeia Lesu, Postu Administrativu Hatudu, Ainaro, domingu (07/06/2020). Imajen/Dok. Tatoli

AINARO, 08 juñu 2020 (TATOLI) – Lider Karizmátika, Kay Rala Xanana Gusmão, hamutuk ho emprezariu Ainaro-oan, Key Xavier, domingu ne’e, halo apoiu solidariedade hodi fahe ai-han ba ema ho defisiénsia sira ho mós kbiit-laek sira hamutuk na’in-80 iha Suku Foho-Ailiku, Postu Administrativu Hatudu, Munisípiu Ainaro.

Notísia Relevante : Xanana ho Key Fó Apoia Solidariedade ba Família Ne’ebé Susar Liu iha Susar Nia-Laran

Ai-han ne’ebé Xanana ho Key Xavier fahe ne’e, kompostu husi foos, mina, supermi, latarias balun, inklui nesesidade báziku seluk tan.

Xanana Gusmão, hamutuk ho Key Xavier, fahe ai-han ba ema ho defisiénsia sira ho mós kbiit-laek sira hamutuk na’in-80 iha Suku Foho-Ailiku, Postu Administrativu Hatudu, Munisípiu Ainaro, domingu (07/06/2020). Imajen/Eugénio Pereira

Xefe Aldeia Lesu, Alcino Amaral Magno, hato’o agradese, tanba foin primeira vés maka Xanana halo vizita ba sira nia aldeia hamutuk ho Emprezáriu Ainaro-oan, Key Xavier hodi tulun povu sira.

Nia dehan, povu sira sente orgullu, tanba la’ós ai-han mak nesesáriu liu ba sira, maibé importante mak Xanana bele vizita hodi haree no hako’ak sira iha tempu susar ne’e nia laran.

“Ami agradese tebes ba Avó Xanana ho Maun Key Xavier nia prezensa hodi fó apoiu ai-han ba ami nia povu kbiit laek no família defisiénsia sira ne’ebé merese atu hetan apoiu ne’e,”  hateten Alcino Amaral Magno.

Iha oportunidade ne’e, populasaun Aldeia Lesu mós aprezenta sira-nia preokupasaun ba Xanana kona-ba kondisaun estrada ne’ebé difikulta atu transporta sira nia produtu lokál ba merkadu ho mós problema bee-moos  ne’ebé tinan barak ona la iha solusaun.

Xanana rasik lia-tun dehan, apoia ne’e nia valor  ki’ik, maibé bele ajuda ona povu, liu-liu ferik no katuas sira ne’ebé defisiénsia matan no la’o labele bele uza hodi konsumu.

“Apoiu ne’e ki’ik tebes, maibé ha’u agradese ba imi oan, Key Xavier ne’ebé hamutuk ho nia fuan boot fó apoiu ba povu barak fatin seluk iha Dili ne’ebá, no ohin fahe nafatin nia domin ho apoiu ai-han hirak ne’e,” Xanana hateten.

Hatán kona-ba problema bee-moos no estrada aat, Xanana dehan, agora nia la’ós ona membru governu, maibé nu’udar Timoroan sei hato’o preokupasaun ne’e ba governu, liu-liu deputadu Parlamentu Nasionál sira hodi tau konsiderasaun ba problema ne’ebé povu enfrenta.

Jornalista        : Eugénio Pereira

Editór               : Francisco Simões

HAKEREK NO HATÁN

Please enter your comment!
Please enter your name here