Lider Karizmátiku, Kay Rala Xanana Gusmão, hakru’uk hodi simu rei hosi avó-feto ida bainhira nia vizita ba Munisípiu Covalima, sesta (05/06/2020) Imajen/Eugénio Pereira.

COVALIMA, 05 juñu 2020 (TATOLI)- Lider Karizmátiku, Kay Rala Xanana Gusmão, ohin, hamutuk ho intelektuál Covalima-oan, Rui Lopes, Alan Cardoso, Espoza Saudozu Lino Lopes, Lurdes Lopes, Carmelita Moniz ho Empreza Jonize, A1 Service, Star King, no EDS no grupu Alimenta Ho Fuan, halo asaun solidariedade hodi fahe ai-han no nesesidade báziku ba populasaun kbiit-laek 193 iha Suai.

Notísia Relevante : Populasaun Kbiit-Laek 113 Agradese ba Xanana

Lider Karizmátiku Kay, Rala Xanana Gusmão, fahe direita apoiu ba populasaun kbiit-laek sira iha Munisípiu Covalima, sesta (05/06/2020). Imajen/Eugénio Pereira

Populasaun kbiit-laek hamutuk 193 kompostu husi  populasaun Aldeia Talotu na’in 67, Weeboot no Laen Tolu (36), Sukabi Mesak (19) no Suku Matai  (71) ne’ebé pertense ba Postu Administrativu Suai Vila, Munisípiu Covalima.

Apoiu ne’e direita husi Xanana Gusmão, ba populasaun kbiit-laek sira, inklui mós komunidade balun ne’ebé sofre inundasaun udan-boot iha loron 28 maiu 2020, liu-liu iha Aldeia Loro, Aldeia Mane Ikus Parte Uma Rohan.

Manuel Nakfahen, ne’ebé simu apoia solidariedade husi Xanana hato’o nia agradesimentu boot ba Xanana tanba konsidera Xanana hanesan lider ida ne’ebé iha fuan boot tebes hodi la’o tuir populasaun sira ne’ebé susar no terus.

“Ami agradese, tanba ami ne’e susar tebes, la’ós tanba coronavirus, maibé susar tanba udan mai estraga ami nia uma halo bee lori tahu taka hale’u uma no foin hetan apoiu ne’e hanesan grasa boot ida ba ami,” hateten Manuel  Nakfahen iha Aldeia Talotu.

Maria Balo nu’udar mós abitante kbiit-laek ne’ebé simu apoia ne’e hato’o mós agradese ba domin boot ne’ebé hatudu husi Xanana ba sira iha tempu susar nia-laran.

Nia hatutan, foin lalais mota boot estraga sira-nia uma no sira mós enfrenta problema osan la iha atu sosa ai-han hodi konsumu.

Iha fatin hanesan, Xefe Suku Loro, Martins Mendonça, apresia ba ajudu ho apoiu ne’e tulun tebes susar ne’ebé povu enfrenta.

“La iha lia furak ida ami hato’o, ami agradese no reza de’it ba Nai Maromak, atu haraik nafatin bensaun isin di’ak ba ita aman Xanana,” Martins Mendonça hateten.

Rui Lopes lori povu Covalima nia-naran hato’o agradese ho vizita espesiál ne’ebé Xanana hala’o hodi tulun kbiit-laek ne’ebé sofre inundasaun foin lalais ne’e.

“Ha’u agradese ba prezensa Maun Xanana too mai tanba domin, la’ós mai buka oin (sensasi), tanba domin ida boot ba ami no ba povu ida-ne’e,” tenik Rui Lopes.

Rui dehan, durante Estadu Emerjénsia (EE), povu labele halo movimentu, tanba ne’e sira koordena malu tau osan hodi apoia ai-han.

Lider Karizmátiku, Kay Rala Xanana Gusmão, rei ho domin boot ba nia povu bainhira nia vizita ba Munisípiu Covalima, sesta (05/06/2020) Imajen/Eugénio Pereira

Husi sorin seluk, Xanana Gusmão hato’o hikas agradese ba laran luak husi intelektuál Covalima-oan ne’ebé hatudu sira nia espíritu no domin lolo liman ajuda kbiit-laek sira iha tempu ida ne’ebé povu presiza tebes ai-han.

“Ha’u mai hodi akompaña de’it Timoroan sira ne’ebé laran luak hodi ajuda ferik no katuas sira ne’ebé la’o ladi’ak, tanba iha ukun-aan nia laran povu ne’e terus fó han ita too ita bele moris iha ukun-aan nia laran para ajuda sira no respeita nafatin sira,” hateten Xanana.

Asaun solidariedade ne’e, tuir Xanana, importante tebes atu Timoroan ho Timoroan tolun malu iha situasaun ne’ebé Timoroan sira hotu susar, mas iha Timoroan balun mak susar liu.

Xanana mós motiva foin-sa’e sira atu kontinua kria pás no buka serbisu hodi ajuda ferik no katuas no ema ho defisiénsia presiza ema hotu nia apoiu.

Iha parte seluk, Xanana mós apresia ho inisiativa Juventude Grupu Alimenta Ho Fuan ne’ebé iha periodu Estadu Emerjénsia (EE) iha primeira etapa to’o terseiru etapa tun direita rekolla lista ema kbiit-laek hodi bele hetan apoiu.

 Jornalista : Eugénio Pereira

Editór       : Francisco Simões

 

HAKEREK NO HATÁN

Please enter your comment!
Please enter your name here