Xefe Gabinete Prezidente Autoridade Rejiaun Administrativa Espesiál Oé-Cusse Ambenu (RAEOA), Silvério Pinto Baptista, Imajen Tatoli/Egas Cristovão

DILI, 12 juñu 2020 (TATOLI)–Ekipa Gabinete Eis Prezidente Autoridade Rejiaun Administrativa Espesiál Oé-Cusse Ambeno (RAEOA), José Luis Guterres ‘Lugu’, ohin, sei entrega Edifisiu Zona Ekonomia Espesiál no Sosiál Merkadu (ZEESM), ba ekipa tranzisaun Prezidente Autoridade (PA) foun Arsénio Paixão Bano.

Notísia Relevante: PM Taur Husu Atoni-Oan Hamutuk ho PA RAEOA Foun Dezenvolve Oé-cusse

“Iha kuarta kotuk, depois de desizaun Konsellu Ministru, ha’u hasai ona informasaun ida ba iha grupu Whatsapp Autoridade ninian, orienta ba kada koordenadór ekipa atu ida-idak prepara ninia relatóriu. Maibé, oras ne’e iha edifísiu Faról Dili, ekipa tranzisaun hosi Prezidente Autoridade foun, Arsénio Bano, ninian mós iha ne’e hela, ami halo preparasaun simples ida atu bele halo termu entrega ba edifisiu iha Faról,” dehan Eis Xefe Gabinete Prezidente Autoridade “Lugu”, Silvério Pinto Baptista, hato’o ba Agência TATOLI iha Edifísiu ZEESM Faról, Dili, sesta ne’e. 

Nia esplika, kona-ba relatóriu enjerál, autoridade tuan deside atu halo serimónia hand over  iha Oé-Cusse, tanba koordenadór sira ida-idak sei aprezenta ninia relatóriu eskrita ba Prezidente autoridade foun katak ida-ne’e mak buat balun ne’ebé halo tiha ona, inklui aprezenta mós planu sira.

“Ita hatene katak, asesór sira ne’ebé mak ba hamutuk ho Prezidente Autoridade sesante José Luis Guterres iha Oé-Cusse durante fulan hitu, sira simu osan estadu no sira tenke aprezenta planu ne’ebé mak sira halo tiha ona ba Autoridade foun,”  Silvério hateten. 

Notísia Relevante: Lugu Simu Dezisaun Governu Ezonera Nia Husi Kargu PA RAEOA

Nia dehan, termu de entrega ne’e tenke iha no hanesan xefe gabinete, nia iha knaar ne’ebé simu hosi Prezidente autoridade sesante tenke asegura ida-ne’e. Maski antes ne’e laiha relatóriu ruma hosi autoridade anteriór lidera hosi Arsénio Bano nu’udár Prezidente autoridade interinu.

“Ha’u ko’alia ho ekipa tranzitóriu hosi Prezidente Autoridade foun nian no ha’u aprezenta katak informasaun ne’ebé mak ha’u hetan hosi koordenadór edifísiu ZEESM Dili, bainhira Jose Luis Guterres hahú ninia servisu iha Novembru tinan kotuk laiha termu de entrega (hand over) husi autoridade anteriór ne’ebé lidera husi Arsénio Bano rasik, iha tempu ne’ebá hanesan prezidente autoridade interinu. Maibé, ha’u orienta ona atu nune’e, tenke prepara relatóriu atu bele entrega eskritóriu Dili nian, inklui ekipamentu sira atu ekipa foun bele utiliza daudaun,” Silvério esplika. 

Kona-ba relatóriu enjerál sei halo iha Oé-Cusse, ne’ebé sei hala’o iha tempu badak maski seidauk deside data fixu.

Entretantu, ekipa tranzisaun husi Prezidente Autoridade foun Arsénio Bano, lidera husi Nene Correia de Almeida.

Notísia Relevante: Lugu Simu Desizaun Governu ho Liman Rua

Jornalista : Cipriano Colo

Editór       :  Cancio Ximenes

HAKEREK NO HATÁN

Please enter your comment!
Please enter your name here