Primeiru-Ministru, Taur Matan Ruak, fó pose ba PA RAEOA-ZEESMS foun, José Luís Guterres ‘Lugu’, iha Palásiu Governu, kuarta (13/11). Imajen Tatoli/António Gonçalves

DILI, 10 juñu 2020 (TATOLI) – Prezidente Autoridade (PA) Rejiaun Administrativu Espesiál Oé-cusse Ambeno (RAEOA) no Zona Ekonomia Espesiál Sosiál Merkadu, Timor-Leste (ZEESM,TL), José  Luís Guterres ‘Lugu’ simu desizaun Primeiru-Ministru, Taur Matan Ruak, ne’ebé aprezenta iha reuniaun Konsellu Ministru hodi ezonera nia no nomeia Arsénio Paixão Bano hodi troka nia fatin.

“Ha’u simu ona notísia husi  desizaun Konsellu Ministru nia, ne’ebé Señor Primeiru-Ministru halo proposta ezonera ha’u. Hanesan kombatente no veteranu iha luta, ha’u simu desizaun husi ita-nia Governu nian,” hateten Lugu ba Agência Tatoli, via telefónika, kuarta ne’e.

Notísia Relevante: Governu Ezonera Lugu no Nomeia Arsénio Bano Asume PA RAEOA

Lugu simu pose nu’dar PA RAEOA-ZEESM,TL iha loron 13 novembru 2019 ba mandatu tinan-lima.

Nia dehan, ho desizaun ne’e, nia parte sei prepara ekipa ida hodi halo hand over servisu husi nia ba PA RAEOA foun bainhira halo ona tomada pose.

“Dezeja susesu ba Pezidente foun, ne’ebé hanesan timor-oan ita akompaña hotu situasaun iha rai-laran, liuliu situasaun polítika daudaun ne’e. Ha’u nafatin kontribui hanesan timor-oan no hanesan ema polítika iha ita-nia rai laran,” nia akresenta.

Tuir Lugu katak antes demisaun ne’e, nia parte hasoru ona PM Taur hodi ko’alia kona-ba kestaun ne’e.

Nia tau fiar ba governasaun ne’ebé lidera husi PM Taur no mós susesu nafatin ba partidu sira ne’ebé maka iha oposizaun.

“Dezeja susesu liu ba ita atu rekopera lalais Coronavírus tanba bainhira ita-nia ekonomia tun, ita lakon osan barak. Tanba ne’e, ita hein katak ita-nia fundu minarai rekopera ekonómia iha rai-laran no bele la’o ba oin ho di’ak liu tan atu povu ne’e labele terus tan,” Lugu  dezeja. 

Kona-ba progresu durante nia mandatu, José Luís haktuir ho rejime duodesimál la fó dalan atu bele halo obra foun, maibé ba de’it bem servisu inklui saláriu.

“Ami pelu menus  selu saláriu no selu dívidas maka atraza, maibé importante liu ami kria amizade solidariadade ho povu Oé-cusse liuhosi vizita suku sira hotu no husi ami-nian gabinete, ami kumpre orientasaun husi Governu Sentrál foin lalais atu distribui ajuda umanitária iha suku sira iha Oé-cusse laran,” nia haktuir.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here