José Luís Guterres ‘Lugu’. Imajen Tatoli/Egas Cristovão

DILI, 10 juñu 2020 (TATOLI)–Governu liuhosi reuniaun Konsellu Ministru, ohin, deside ezonera Prezidente Autoridade Rejiaun Administrativa Espesiál Oecusse Ambeno (RAEOA), José Luis Guterres ‘Lugu’, hodi nomea hikas Arsénio Bano atu asume kargu ne’e ba mandatu tinan lima.

Notísia Relevante: Governu Ezonera Lugu no Nomeia Arsénio Bano Asume PA RAEOA

Líder nasionál, José Luis Guterres ‘Lugu’, simu desizaun Governu ne’e ho liman rua tanba nia hatene situasaun aliansa politika mak nia lala’ok hanesan ne’e. 

“Situasaun aliansa politika mak ne’e ona.  Antes ne’e, iha enkontru dala-rua ho Primeiru-Ministru, Taur Matan Ruak,  hateten mai ha’u katak, FRTETILIN hakarak Oé-Cusse. Tanba ne’e, nomeasaun ba Prezidante autoridade nu’udár kandidatu hosi FRETILIN, Arsénio Bano, atu substitui ha’u. Ha’u simu Konsellu Ministru ninia desizaun ho liman rua,” dehan Lugu ba Ajénsia Tatoli liuhosi entrevista eskluziva iha Fatuhada, Dili, kuarta ne’e.

Oras ne’e daudaun, Lugu prepara hela dokumentu hotu ne’ebé iha atu entrega ba Prezidente Autoridade foun, nia dezeju susesu ba povu Oé-Cusse, susessu ba Prezidente Autoridade foun.

“Ha’u haree mós ba iha VIII governu, ha’u nia dezeju susesu ba Primeiru-Ministru, Taur Matan Ruak, ho Governu Konstitusionál tomak, tanba povu Timor-Leste presiza duni dezenvolvimentu ekonómiku, presiza mós pás no estabilidade iha rai laran,” nia dezeja.

Hanesan ema ne’ebé mak iha atividade politika tempu barak ona  desde tempu rezisténsia to’o ohin loron, Lugu sei fó nia kontribuisaun ba iha situasaun politika iha rai laran, atu nune’e situasaun hotu bele iha estabilidade no presiza mós halo buat hotu ho seriedade, ho pás, atu nune’e ema haree nudár ezemplu ba pás no estabildade.

“Ohin ne’e loke kapitulu foun ida. Tanba depois de hetan nomeasaun iha fulan hitu ba kotuk, ami halo servisu iha limitasaun nia laran, iha orsamentu duodésimu. Tanba ne’e mak investimentu ita labele halo, no ita depende de’it ba iha duadésimu. Maibé ami konsege halo buat ida ne’ebé maka, re-liga fali instituisaun estadu nasionál nian ho RAEOA,” Lugu hateten.

Nia esplika, uluk ministériu sira atu ba tenke husu lisensa iha autoridade no bainhira nia asume kargu nu’udár prezidente autoridade, nia hakotu kedas katak kualkér ministru hosi ministériu ne’ebé mak atu ba, la presiza husu autorizasaun maibé autoridade informa de’it katak simu liuhosi protolkolu estadu ninian.

Alende ne’e, autoridade mós re-liga fali ho autoridade tradisionál sira, tanba prosesu dezenvolvimentu bainhira la konta ho xefe suku sira, signifika povu ne’e sai haree-na’in de’it. 

“Ida ne’e mai lakohi atu buat ne’e akontese iha rai Oé-Cusse. Maibé, ami ba vizita suku barak, bainhira COVID-19 mosu, ami envolve kedas xefe suku sira, instituisaun médiku sira, enfremeiru sira, defeza no seguransa, atu nune’e ita kumpre hotu hodi halo tuir buat hotu ne’ebé mai hosi Organizasaun Saúde Mundiál no mós organizasaun Governu nian. Tanba ne’e, ha’u bele dehan katak ita-nia Brigada Choque iha Oé-Cusse halo duni servisu di’ak. Oras ne’e, kontinua halo servisu, ida-ne’e mak ha’u dezeja ba sira atu susesu no tenke heteke ba oin,” Lugu esplika.

Kona-ba invenstimentu, Lugu hateten, ema barak mós hakarak ona atu mai halo investimentu, hafoin COVID-19. Tanba ne’e, nia hein katak depois COVID-19, investidór sira bele tama ona maibé fundamentalmente presiza duni atu kria estabilidade sosiál no polítika.

“Estabilidade sosiál no politika ne’e ita bele hetan  hosi autoridade tradisonál sira no mós partidu politiku sira. Tanba ne’e maka iha preparasaun foin lalais ne’e, autoridade hakarak atu ema sira ne’ebé okupa sekretáriu rejionál sira tenke iha reprezentasaun hosi partidu hotu ne’ebé mak hetan asentu iha Parlamentu Nasionál, nune’e bele iha estabilidade politika, atu bele atrai investór sira iha RAEOA,” Lugu subiliña.

Maski tuir lei iha akordu ba mandatu tinan lima, maibé Lugu haree ba iha alterasaun politika nível nasionál bele akontese.

“Oras ne’e daudaun ha’u haree liu ba nasaun. Ha’u lakohi atu rai ódiu ba sé-sé de’it.  Tanba ita-nia nasaun ne’e presiza pás no estabilidade no mudansa politika ne’ebé iha halo sein violénsia no tuir duni konstituisaun ne’ebé iha,” Lugu hateten tan.

Nia hein katak, VIII Governu bele too fim mandatu, nune’e mós ministru sira ne’ebé hetan ona nomeassaun bele hala’o knaar, hanoin povu ne’ebé mak atu serbi.

“Hanesan ha’u dehan desde inisiu simu pose to’o ohin loron remata, ha’u sempre dehan katak ha’u ba atu serbi povu la’os atu ukun povu Atoni,” Lugu hameno.

Notísia Relevante: Lugu Simu Dezisaun Governu Ezonera Nia Husi Kargu PA RAEOA

Jornalista : Cipriano Colo

Editór      : Cancio Ximenes

HAKEREK NO HATÁN

Please enter your comment!
Please enter your name here