Prezidente Konsellu Administrasaun Institutu Nasionál Seguransa Sosiál (INSS), Longuinhos Armando. Imajen Tatoli/Osória Marques.

DILI, 14 maiu 2020 (TATOLI)–Prezidente Konsellu Administrasaun Institutu Nasionál Seguransa Sosiál (INSS), Longuinhos Armando informa, tuir dadus agora daudaun kondutór transporte públiku rejistu iha INSS hamutuk besik 6000-resin atu no sei bele hetan subsídiu hosi Governu.

Nia hateten, Seguransa Sosiál fó rejistu ba kondutór transporte públiku sira ne’ebé tula pasajeiru hahú iha segunda (11/05/2020) iha Seguransa Sosiál hodi bele hetan subsídiu hosi Governu relasiona ho pandemia COVID-19 iha Timor-Leste.

“Agora daudaun kondutór transporte públiku rejistu iha INSS hamutuk besik 6000-resin atu simu subsidiu hosi Governu. Tuir loloos ita rejista ba kompañia setór formál sira ne’ebé rejistu ona iha Institutu Nasionál Seguransa Sosiál ona. Maibé, ita-nia Governu haree katak pandemia COVID-19 nia impaktu boot ba ita-nia setór naun formál sira hanesan kondutór hakarak rejistu. Maibé mak ne’e, depois rejistu Governu fó tiha osan subsidiu tenke rejistu-aan ona iha Seguransa Sosiál. La’ós sira simu tiha subsidiu husi Governu depois lakon,” dehan Prezidente Konsellu Administrasaun INSS, Longuinhos Armando, ba Ajénsia TATOLI iha nia serbisu fatin, Caicoli, Dili, kinta ne’e.

Tuir loloos, nia dehan, kondutór sira hala’o rejistu iha semana rua kotuk ne’e maibé INSS mós sei prepara dekretu lei ka komunikasaun ruma ne’ebé en-vigór tanba serbisu hotu tenke bazeia ba dekretu lei. Depois hein diploma ministeriál sai ona mak prepara gia nune’e bele rejistu.

“Tanba ida ne’e mak, hanesan tékniku Seguransa Sosiál prepara guia ka kritériu lubuk ida rigorozu uituan atu nune’e ita mós hakarak eduka traballadór sira ne’ebé mak mai rejistu ona Seguransa Sosiál. Tanba tuir ministru sira katak sira mós tenke hetan Seguransa Sosiál. Entaun ami mós fasilita sira tanba ne’e ohin imi haree iha karik sira rejistu ona,” nia dehan.

Nia hateten, tuir Dekretu 16, artigu 5 númeru 2 hatete katak Governu fasilita transporte públiku ne’ebé tula pasajeiru hodi rejistu iha seguransa sosiál.

Prezidente ne’e afirma, subsidiu ne’ebé kondutór ka transporte públiku sira hetan ba fulan rua hosi fulan abril to’o maiu.

“Tuir ita-nia Governu nia desizaun katak kondutór sira mós hetan subsidiu ba fulan abril-maiu nian. Osan hira ita lahatene maibé Governu só fó ajuda ba sira mak pursentu 60 (60%) ba sira-nia empreza ka setór formál sira hodi kompleta ba saláriu traballadór nian,” nia esplika.

Prezidente INSS haktuir, sei kontinua fó rejistu ba kondutór transporte públiku iha Munisípiu sira hotu maibé atu moras pandemia COVID-19 ne’e bele menus ona maibé Governu nafatin fó subsidiu mantein fulan rua nian.

“Governu nafatin fó subsidiu ba kondutór transporte públiku sira maske pandemia COVID-19 menus ona,” nia dehan.

Relasiona ho pandemia COVID-19, kondutór hotu-hotu iha direitu atu hetan subsidiu hOsi Governu maibé tenke tuir kritériu hosi INSS hanesan karta kondusaun, SIM no karta lisensa ba atividade nian.

“Bainhira kondutór sira mak rejistu laiha rekezitu sira tuir kritériu INSS mak sei lasimu no mós karta kondusaun mate kleur ka SIM mak hakerek ho PRIVADU entaun ami sei la simu,” nia dehan.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here