Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto. Imajen Tatoli/Osória Marques

DILI, 11 juñu 2020 (TATOLI)–Diretór Jerál Ministériu Solodaridade Sosiál no Inkluzaun (MSSI), Rui Manuel Gago Exposto, hatete benefisiariu salariu $500 bele simu subsídiu $200 tanba hakerek nanis ona iha (bazeia ba) dekretu-lei Nú.15/2020, 30 abril, kona-ba apoiu umanitáriu. 

Notísia Relevante: Benefisiáriu Saláriu $500 Bele Simu Subsídiu $200

Nia hatutan, iha dekretu-lei refere ne’ebé ko’alia kona-ba apoiu ‘Monetáriu ba Agregadu Família iha Ámbitu Pandemia COVID-19’ ne’e, iha artigu 2 kona-ba ‘Bnefesiáriu Sira’, iha alinea 2 hateten ema ne’ebé la benefisia ba subsídiu ne’e mak ema ne’ebé regularmente kontribui rejimentu kontribuitivu, naun kontribuitivu ka espesial ho montante $501 ba leten.  

“Salariu $500 mai kraik bele simu tanba iha dekretu-lei númeru 15/2020 kona-ba apoiu umanitáriu, artigu 2 kona-ba “benefisiáriu” iha alinea 2 hateten, não beneficiam do apoio monetário os “Uma Kain” em que pelo menos um dos seus elementos aufira mensalmente e de forma regular, rendimentos provenientes de trabalho em instituições públicas ou entidades privadas, de rendimentos empresariais, de rendimentos prediais ou de prestações sociais, provenientes de regimes contributivos, não contributivos ou especiais, em montante mensal superior a 500 dólares americanos,” dehan Rui Manuel Gago Exposto ba Agência TATOLI iha nia knaar fatin, Caicoli, Dili, kinta ne’e. 

Hafoin, nia hatutan, Governu mós uza diploma ministeriál konjunta ne’ebé mak asina hamutuk ho Ministériu Administrasaun Estatál ho MSSI iha númeru 18. Informasaun hirak ne’e, tuir nia, públika ona iha jornál repúblika katak sé mak elizivél atu simu no sé mak la elizivél atu simu. 

Aleinde ne’e, nia hateten, tuir loloos eis titulár sira labele ba rejistu maibé naran ne’e mai hosi suku, sira-nia kartaun elitóral la anexa ho dadus entaun sistema la deteta. Ho ida-ne’e mak sira-nia naran sai nafatin iha lista benefisiária nian.

“Maibé husu atu ita iha konsiénsia no onestu de’it katak ida ne’ebé mak rendimentu boot, entre ita sira ne’ebé mak naran tama iha lista, benefisiáriu sira maka sente la merese atu simu, di’ak liu lalika simu. Ita entrega ka hatama osan ne’e ba fali kofre Estadu,” nia dehan. 

Nia repete tan, ema sira ne’ebé mak iha direitu atu simu subsídiu $200 iha ámbitu pandemia COVID-19 ne’e mak ema sira-ne’ebé mak nia rendimentu fulan ida simu saláriu hosi $500 mai kraik ne’e no ema sira n’ebé simu salariu $501 ba leten, di’ak liu lalika simu.

“Ha’u hanoin, hirak ne’ebe labele simu, di’ak liu kontribui fali ba ema seluk no osan sei fila ba kofre Estadu. Husu para sidadaun hotu-hotu iha onestu para osan ne’e povu nian no osan ne’e sei fila ba povu ida ne’ebé mak presiza tebes duni,” nia dehan. 

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here