Embaixadór Xina, Xiao Jianguo entrega diretamente apoiu fasilidade prevensaun COVID-19 ba Ministru Administrasaun Estatál,Miguel Pereira de Carvalho. Imajen : Hortencio Sanchez.

DILI, 05 juñu 2020 (TATOLI)-Governu Xina liuhosi ninia Embaixada iha Timor-Leste iha sesta ne’e distribui tan apoiu ekipamentu prevensaun COVID-19 hanesan máskara 40.000 no hand sanitizer botir 560 ba Munisípiu Manatuto no Ministériu Administrasaun Estatál (MAE) Nasionál.

Embaixadór Xina, Xiao Jianguo maka entrega diretamente apoiu ne’e ba Ministru Administrasaun Estatál, Miguel Pereira de Carvalho no Administradór Munisípiu Manatuto, Fernando de Sousa Junior.

Notísia Relevante :Xina Entrega Ekipamentu Prevensaun Coronavirus ba TL

Ministru Administrasaun Estatál, Miguel Pereira de Carvalho, hateten Emprezáriu husi Provinsia Hunan Xina maka apoiu fasilidade refere tanba antes ne’e sira iha ona relasaun di’ak ho povu Manatuto.

“Iha pasadu Emprezariu bo’ot sira husi Hunan mai vizita Autoridade lokál sira Manatuto hodi haree oinsá bele dezenvolve área sira liliu agrikultura, ho nune’e mak iha tempu defisil hanesan ne’e povu Hunan hakarak apoiu ba komunidade sira iha Manatuto nune’e bele luta hasoru COVID-19,”informa Governante hafoin simu apoiu ne’e iha Embaixada Xina Ai-Tarak-Laran Dili, sesta ne’e.

Notísia Relevante :Governu Timor-Leste Simu Doasaun Kombate COVID-19 Husi Governu Xina

Husi máskara rihun 40 ne’e, 10.000 rai ba Ministériu Administrasaun Estatál Nasionál no rihun 30.000 distribui ba komunidade iha Munisípiu Manatuto.

Iha biban hanesan Administradór Munisípiu Manatuto, Fernando de Sousa Junior, reprezenta ninia komunidade hodi agradese Povu no Emprezáriu Provinsia Hunan Xina.

“Lori Povu Manatuto nia naran hau fó obrigado barak fiar katak ba oin populasaun Manatuto bele hetan hotu apoiu ne’e nune’e bele prevene an hosi moras Coronavirus,” dehan Autoridade Munisípiu Manatuto ne’e.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here