Presidente Institutu Nasionál Seguransa Sosiál (INSS) Longuinhos Armando. Imajen/Egas Cristovão

DILI, 05 juñu 2020 (TATOLI)–Prezidente Institutu Nasionál Seguransa Sosiál (INSS), Longuinhos Armando, hateten Seguransa Sosiál seidauk bele fó sai totál dadus subsídiu ba traballadór sira tanba sei iha prosesu verifikasaun.

Notísia Relevante: Kompañia 1.344 Halo Ona Aplikasaun ba Rejime Kontributivu Seguransa Sosiál

“Ami hosi Institutu Nasionál Seguransa Sosiál seidauk bele fó totál kompañia ka traballadór sira ba saláriu 60% tanba ita sei iha faze verifikasaun dadus,” dehan Prezidente Institutu Nasionál Seguransa Sosiál,  Longuinhos Armando, informa ba Ajénsia TATOLI iha nia knaar fatin MSSI, Caicoli, Dili, sesta ne’e.

Nia hatutan, Institutu Nasionál Seguransa Sosiál sei haree dadus hotu hosi kompañia ka traballadór sira katak sira mai rejistu no prenxe kritériu Ka la’e, mak la prenxe kritériu hosi Seguransa Sosiál mak sei lahetan subsídiu.

Ezemplu, nia haktuir, traballadór ida mak nia karta kondusaun, karta lisensa ne’ebé mate maibé bainhira karta kareta mate iha situasaun COVID-19, parte INSS sei bele simu. Maibé, tuir nia, karta refere mate antes hafoin COVID-19 mosu, nia laiha direitu atu hetan subsídiu ne’e.

Subsídiu 60%, nia dehan, INSS hatama ona proposta ba Governu kuaze millaun $14-resin hodi selu traballadór sira.

“Mais proposta ne’ebé mak ami halo para atu asegura hodi bele fó subsídiu 60% ba traballadór sira kuaze millaun $14-resin ba Governu.” nia dehan.

Nia hateten, se ema tama servisu maibé nia saláriu la kompletu mak Governu ajuda hodi transfere osan ba sira-nia kompañia atu rekoopera fali ema nia saláriu tanba ema servisu, ne’ebé selu de’it 40%. Tanba ne’e, labele fó sala ba Kompañia tanba kompañia lahetan rendimentu, nune’e Governu aumenta 60% hodi kompleta sira-nia saláriu.

Tanba ne’e, nia husu, labele konfundi kona-ba subsídiu uma-kain no subsídiu traballadór tanba subsídiu rua hosi Governu maibé la hanesan.

“Ita labele konfuzaun ho subsídiu rua ne’e tanba sira-nia karater lahanesan, tanba ida fali Governu selu ba uma-kain nian no ida seluk fali Governu selu ba traballadór sira. Nune’e,  xefe família nafatin iha direitu karik nia mós ema traballadór ida empreza nian,” nia hateten.

Antes ne’e, rejime kona-ba inskrisaun no obrigasasun kontributivu ne’ebé aprezenta hosi Ministériu Solidariedade Sosiál (MSS) hetan ona aprovasaun iha Konsellu Ministru iha 07 marsu 2017, inklui mós rekomendasaun hosi membru Governu sira.

Notísia Relevante: Setembru, Governu Sei Implementa Rejime Kontributivu Seguransa Sosiál

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here