DILI, 21 novembru 2019 (TATOLI)-Kompañia hamutuk 1.344 mak halo ona aplikasaun ba kontribuisaun seguransa sosiál ba nia traballadór na’in 5.844.
Notísia Relevante : INSS Planu Prodús Kartaun Identidade Seguransa Sosiál
Prezidente Konsellu Administrasaun INSS, Longuinhos Armando, informa katak, hosi total kompañia 1344 kompostu hosi kompañia nasionál 1.311 no kompañia estranjeiru 33.
Kompañia sira ne’e halo aplikasaun ba kontribuisaun seguransa sosiál ne’e ho nia atividade hanesan loke loza nune’e mós ajénsia, embaixada, universidade balun no tipu kompañia lukrativu sira seluk tan.
Nia esplika, traballadór atu kontribui ba seguransa sosiál hosi depende ba nia saláriu kada fulan-fulan. Ezemplu, raladór ida ho nia saláriu $200 entaun sei ko’a 4% ($8.00) no empregadór rasik mós kontribui 6% ($12.00) ba nia traballadór.
“Polítika kontribuisaun seguransa sosiál ne’e atu asegura direitu traballadór nian ba tempu oin kuandu reforma bele asesu fali osan poupansa durante ne’e rai hanesan kontribuisaun seguransa sosiál,” esplika Longuinhos Armando, ohin, hodi responde TATOLI iha nia kna’ar fatin, Caicoli, Dili.
Institutu Nasional Seguransa Sosiál (INSS) kontinua hala’o sosializasaun ba kompañia ba traballadór atu iha koñesimentu ba rejime naun Kontributivu seguransa sosiál iha territóriu laran.
Tuir dekretu lei númeru 20/2017 hatete, ba rejime naun Kontributivu seguransa sosiál obrigatóriu ba empregadór ne’ebé emprega traballadór nain sanulu ba leten tenke rejistu.
“Ami hahú servisu hamutuk ho Sekretáriu Estadu Polítika Formasaun Professional no Empregu (SEFOPE) atu tinan oin kompañia ne’ebé lakohi rejistu no lakohi asegura nia traballadór komesa aplika sansaun hanesan kuandu kompañia ne’e ba hasai ka tuir buat ruma nia sertidaun divides sei la atribui,” afirma Longuinhos Armando.
Jornalista : Nelson de Sousa
Editór : Francisco Simões
