Ministra Solidariedade Sosiál no Inkluzaun Armanda Berta dos Santos. Imajen/António Gonçalves

DILI, (TATOLI) – Ministra Solidaridade Sosiál no Inkluzaun, Armanda Berta dos Santos, hateten governu sei esforsu hodi hahú implementa rejimé kontributivu seguransa sosiál ba setór públiku no privadu iha setembru 2018.

ʺSetembru ba oin sei la’o ona ho ami nia esforsu maka’as atu implementaʺ, governante ne’e ba jornalista sira iha uma fukun Parlamentu Nasionál, ohin.

Lejislasaun númeru 12 /2016, 14 de novembru promulga ona hosi eis Prezidente Repúblika, Taur Matan Ruak, iha maiu  2017. ʺLei ne’e iha ona, tanba ne’e ita tenke haree ona para implementaʺ, akresenta.

Tuir lei, traballadór sei kontribui pursentu haat no entidadade empregadór sira sei kontribui pursentu neen ne’ebé sei jere hosi Ministériu Solidariedade Sosiál no Inkluzaun.

Entretantu seguransa sosiál nu’udár direitu umanu fundamentál tuir deklarasaun universál ba  direitu umanu iha artigu 24.

Liu husi deklarasaun ne’e, Estadu Timor-Leste konsagra kedas iha Konstituisaun Repúblika Demokrátika Timor-Leste (RDTL) artigu 56 ne’ebé iha pontu ida hateten sidadaun hot-hotu iha direitu ba seguransa no asisténsia sosiál tuir lei no kna’ar Estadu nian.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here