CAC, PDHJ, IGE no Organizasaun La’ós Governu nian (ONG); Judisiál System Monitoring Program (JSMP) ho Forum ONG Timor-Leste (FONGTIL), sesta (05/06/2020), halo enkontru koordenasaun iha edifísiu CAC, Farol, Dili, hodi hamutuk tau matan ba ezekusaun fundu COVID-19. Imajen/Mídia CAC

DILI, 05 juñu 2020 (TATOLI) – Atu bele iha transparénsia no kontabilidade ba ezekusaun fundu COVID-19 nian, maka Komisaun Anti Korrupsaun (CAC, sigla portugés), Provedoria Direitu Umanu no Justisa (PDHJ), Inspetór Jerál Estadu (IGE) ho organizasaun sosiedade sivíl, komprometidu atu “eskolta”  ka firme halo akompañamentu ba ezekusaun fundu refere.

Notísia Relevante : CAC Halo “Supervizaun” ba Pagamentu Subsídiu $100

Liuhusi enkontru, ohin iha edifísiu CAC, Farol, Dili,  entre CAC, PDHJ, IGE no Organizasaun La’ós Governu nian (ONG);  Judisiál System Monitoring Program (JSMP) ho Forum ONG Timor-Leste (FONGTIL) sei tau matan ba ezekusaun fundu COVID-19.

Komisáriu CAC, Sergio Hornai, klarifika katak enkontru ne’e atu hametin liu tan kooperasaun entre instituisaun hirak ne’e hodi monitoriza implementasaun pagamentu apoiu monetáriu ba agregadu familiar (fundu COVID-19) ne’ebé VIII Governu Konstitusionál através Ekipa Task Force COVID-19 iha Ministériu Solidariedade Sosiál no Inkluzaun (MSSI) nian tutela sei hahú implementa iha loron 09 juñu, semana oin iha territóriu tomak, esklui Rejiaun Administrativa Espesiál Oe-Cusse Ambeno (RAEOA).

“Espera fundu COVID-19 ne’e bele to’o iha populasaun hirak ne’ebé merese duni simu sem manipulasaun,” afirma Sergio Hornai.

Notísia Relevante :CAC-FONGTIL Monitoriza Ezekusaun Fundu Ba COVID-19 

Nia afirma tan, manipulasaun ba dadus, total loron no orsamentu ba perdiem funsionáriu sira inklui orsamentu ba aluga karreta nian sei simu ninian konsekuénsia kriminalidade todan.

CAC ho instituisaun relevante sira sei tau-matan ba implementasaun fundu COVID-19 ho rigór no kuidadu iha territóriu tomak.
Tanba ne’e, CAC  iha esperansa katak parte implementadór liuhusi MSSI ho parte relevante sira seluk tan sei ezekuta fundu COVID-19 ho kontabilidade no  transparente.

Jornalista : Nelson de Sousa

Editór       : Francisco Simões

 

HAKEREK NO HATÁN

Please enter your comment!
Please enter your name here