Logotipu Komisaun Anti -Korrupsaun (CAC-sigla Portugés).

DILI, 03 juñu 2020 (TATOLI) – Komisaun Anti Korrupsaun (CAC, sigla portugés) sei halo “supervizaun” ba pagamentu subsídiu $100 ba kada uma-kain iha territóriu nasionál.

Notísia Relevante : Aban, MSSI Sei Anúnsia Kalendáriu Pagamentu Subsídiu $100 Ba Públik

Komisáriu Adjuntu ba asuntu Investigasaun CAC, Augusto da Costa Castro, ohin, ba Agência Tatoli iha nia serbisu fatin, Edifísiu CAC, iha Faról, Dili, informa, CAC sei akompaña ba prosesu hotu kona-ba pagamentu subsídiu $100 ne’ebé governu fó apoiu direita ba família uma-kain iha periodu implementasaun estadu emerjénsia.

“CAC sei akompaña másimu atu garante nia ezekusaun tuir duni alvu,” hateten Komisáriu Adjuntu Augusto da Costa Castro.

CAC konsidera polítika governu nian ne’e di’ak tebes atu hakmaan família sira nia sofrimentu iha situasaun estadu emerjénsia, maibé presiza garante  duni transparénsia no  merese fó duni ba família ne’ebé rendimentu ki’ik tuir rekizitu ne’ebé katak hirak ne’ebé nia rendimentu liu $500 la merese atu simu.

Nia hatutan, CAC nia devér no obrigasaun  atu halo akompañamentu hodi foti informasaun, karik akontese irregularidade ruma kona-ba iha pagamentu ne’e.

CAC apela nafatin ba Ministériu Solidariedade, Sosiál no Inkluzaun (MSSI) ho Ministériu Administrasaun Estatál (MAE) atu halo apuramentu no abreviguasaun loloos ba dadus uma-kain ne’ebé ofisiálmente rejista ona.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here