DILI, 08 maiu 2020 (TATOLI) – Komisaun Anti Korrupsaun (CAC-sigla portugés) ho organizasaun la’ós governu nian (ONG) FONGTIL hametin rede serbisu hodi oinsá halo monitorizasaun ka fiskalizasaun ba ezekusaun orsamentu COVID-19.
Notísia Relevante : CAC Husu Atu iha Transparente ba Ezekusaun Orsamentu COVID-19
Orsamentu Estadu ho valor millaun $250 ne’ebé koloka ba serbisu no nesesidade hotu luta kontra COVID-19 ne’e konsentradu iha konta VIII governu.
Liuhusi enkontru entre parte rua; CAC ho FONGTIL iha Edifísiu CAC, Farol, Dili, sesta (08/05/2020) Komisáriu CAC Sergio Hornai ho Diretór FONGTIL, Daniel Marsal, esklarese katak, reuniaun ne’e hanesan reuniaun kontinuasaun ne’ebé parte rua halo ona antes hodi hametin liu- tan atu haree no monitoriza ezekusaun orsamentu ba COVID-19 husi perspetiva advokasia nian para garante ezekusaun orsamentu estadu ninian ho transparénsia.
Sergio Hornai hatutan, orsamentu ne’e utiliza ona husi instituisaun kompetente, maibé presiza iha fiskalizasaun atu bele garante utilizasaun ne’e ho di’ak.
Komisáriu Sergio Hornai fiar katak instituisaun ka órgaun estadu nian hanesan CAC Tribunál Konta, Prokuradór Jerál Repúblika, Inspektór Jerál, inklui mós sosiedade sivíl ho mídia sira, hala’o nia papél atu monitoriza ba fiskaliza utilizasaun orsamentu COVID-19 ne’e ho transparénsia no responsabilidade.
Jornalista : Nelson de Sousa
Editór : Francisco Simões
