Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto. Imajen Tatoli/Osória Marques.

DILI, 04 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Exposto, hateten Governu seidauk bele halo pagamentu subsídiu ba komunidade sira iha Rejiaun Administrativa Oé-Cusse Espesial Ambeno (RAEOA) tanba suku sira RAEOA seidauk iha konta bankária hodi halo transferénsia osan.

Notísia Relevante: Komunidade 80% Laiha Konta Bankaria, BNCTL Labele Halo Pagamentu Direta

Nia hatutan, Governu la halo diskriminasaun maibé hafoin halo hotu tiha pagamentu subsidu ba komunidade sira iha munsipiu 12, Governu sei konsentra fali iha Oé-Cusse.

“Husu ba komunidade Oé-Cusse atu klama uitoan. Governu lahalo diskriminasaun maibé depois halo tiha pagamentu ami sei konsentra fali iha Oé-cusse”, dehan Rui Manuel Gago Exposto ba
Ajénsia TATOLI iha nia knaar fatin, Caicoli, Dili, kinta ne’e.

Iha loron 25 fulan maiu tinan ne’e, nia informa, Ministra Solidaridade Sosiál no Inkluzaun haruka karta ida ba Prezidente RAEOA-ZEESM katak atu nomeia pontu vokál ida hodi halo diskusaun ne’ebé mais tékniku hodi buka solsaun ba asuntu ne’e.

Maibé, nia dehan, to’o agora Autoridade RAEOA seidauk responde ba preokupasaun refere hodi autoriza ninia reprezentante ida hodi halo diskusaun kona-ba alokasaun orsamentu ba subsídiu agregadu familiar ba kada konta bankária suku nian, tanba iha dekretu leí númeru 17 esplika katak pagamentu ba subsídiu kada agregadu familiar tenke iha nia konta bankária suku diretamente.

Nia dehan ekipa sekretariadu MSSI rejista 318,151 benefisiária no totál orsamentu hamutuk $63.630.200.00 ba territóriu Timor Leste.

Notísia Relevante:  Governu Benefísia Uma-Kain 298.119 iha Munisípiu 12

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here