Diretór Jerál Ministeriu Soliedariedade Sosial Rui Manuel Gago Exposto.Imajen/Tatoli Egas Cristovao.

DILI, 04 juñu 2020 (TATOLI)–Diretór Jerál Ministériu Solidaridade Sosiál no Inkluzasaun (MSSI), Rui Manuel Gago Exposto, hateten Banku Nasionál Komérsiu Timor Leste (BNCTL-sigla portugés) labele halo pagamentu direta ba agregadu familiár tanba komunidade maiória mak seidauk iha konta bankária.

Notísia Relevante: Governu Benefísia Uma-Kain 298.119 iha Munisípiu 12

“Timor-Leste nia populasaun to’o agora 80% mak seidauk iha konta bankária. Tanba ne’e mak ita tenke halo pagamentu liuhusi semi manuál ka foti iha banku mak fahe direita ba benefisiáriu sira. BNCTL halo kooperasaun ho MSSI hodi oinsá asegura osan hodi to’o iha fatin pagamentu,” dehan Diretór Jerál MSSI, Rui Manuel Gago Exposto, ba Ajénsia TATOLI iha nia knaar fatin, Caicoli, Dili, kinta ne’e.

Nia hatutan, kada suku mak halo nia oráriu pagamentu nian hafoin ekipa pagamentu no autoridade komunitáriu sira mak halo verifikasaun ba dadus no simu reklamasaun ruma hosi benefisiáriu sira bainhira benefisiáriu balun halo reklamasaun kona-ba nia dadus subsídiu.

“Bainhira Xefe Suku sira foti osan iha banku, purezemplu, foti iha loron 08 juñu entaun loron 09 juñu, ita-nia ekipa pagamentu hahú fahe osan direta ba benefisíariu sira,” nia hateten.

Ekipa pagamentu, nia dehan, la’ós de’it hosi MSSI nian maibé hosi liña ministeriais hotu ne’eb’e serbisu hamutuk BNCTL.

Tuir dadus, nia hateten, iha Munisípiu 12 ne’e iha suku 434 mak sei simu subsídiu hosi Governu maibé iha suku no postu administrativu balun família uma-kain ladún barak.

Prosesu pagamentu subsídiu ba agregadu familiár ne’e sei hetan seguransa másimu hosi membru Protesaun Sivíl, Polisia Nasionál Timor Leste (PNTL) inklui Falintil-Forsa Defeza Timor-Leste.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here