DILI, 03 juñu 2020 (TATOLI)–Ministra Solidaridade Sosiál no Inkluzaun (MSSI), Armanda Berta dos Santos, hatete Governu Timor-Leste liuhosi Ministériu Solidariedade Sosiál no Inkluzaun apoiu monetáriu sei benefísia uma-kain hamutuk 298.119 iha Munisípiu 12 la inklui Rejiaun Administrativa Espesiál Oé-Cusse Ambeno (RAEOA).

Notísia Relevante: MF Finaliza Transferénsia Millaun $59,6 ba Uma-Kain 298.119, La Inklui RAEOA

“Transferénsia ho totál hamutuk montantante $59,623,800 00 koresponde ba pagamentu apoiu monetáriu uma-kain ba fulan rua hamutuk $200,” dehan Ministra Solidaridade Sosiál no Inkluzaun (MSSI), Armanda Berta dos Santos, anunsia kalendáriu pagamentu subsídiu ba públiku liuhosi konferénsia imprensa iha Salaun MSSI, Caicoli, Dili, kuarta ne’e.

Atuál Vise Primeira-Ministra ne’e hatutan, objetivu hosi apoiu monetáriu ne’e hodi garante sustenta família sira no apoiu lakuna despezas tanba situasaun COVID-19.

“Husu ba uma-kain sira atu kolabora ho ekipa pagamentu to’o iha momentu ekipa tún ba ita-boot sira-nia suku no aldeia ba realizasaun pagamentu,” nia dehan.

Governante ne’e husu ba parte hotu-hotu nia kolaborasaun no servisu hamutuk ba mantein pás, estabilidade no kumpre ba rekezitus no lei ne’ebé vigora durante prosesu ne’e.

Tuir nia, kalendáriu no prosesu pagamentu ne’ebé sei hala’o uluk iha munisípiu 12 ne’ebé mak sei hahú iha tersa-feira, loron-09 juñu 2020, sei realiza iha suku tuir oráriu pagamentu ne’ebé iha.

Tanba ne’e, nia husu ba xefe uma-kain sira atu marka prezensa iha sentru pagamentu tuir oráriu pagamentu no kumpre orientasaun hosi Ministériu Saúde no Organizasaun Mundiál Saúde (OMS) kona-ba distánsia fíziku no sosiál.

Nia dehan, Pandemia Covid-19 iha Timor Leste no deklarasaun Estadu Emerjénsia fó impaktu ba vida sosiál ekonómiku povu nian no hamosu problema sosiál. Ho nune’e, Governu Timor Leste liuhosi MSSI foti medida intervensaun ho programa apoiu monetáriu ba uma-kain sira ne’ebé presiza liu iha territóriu tomak.

Entretantu, Diretór Jerál MSSI, Rui Manuel Gago Exposto informa, prosesu pagamentu ba agregadu familiar sei hala’o durante loron 14 nia laran, ne’ebé bazeia ba mobilizasaun hosi Banku Nasionál Komérsiu Timor Leste (BNCTL-sigla portugés) hosi munisípiu ba Postu Administrativu.

“Ami enkaisa tuir oráriu BNCTL nian atu labele prejudika iha atendementu pagamentu iha Munisípiu 12 ezetu mak RAEOA,” nia dehan.

Diretór Jerál ne’e informa, RAEOA seidauk bele halo pagamentu tanba iha problema ho tékniku balu, nune’e hafoin halo tiha pagamentu iha munisípiu 12 mak fila konsentra fali iha RAEOA.

“Ami la’o tuir kalenáriu hosi BNCTL tanba BNCTL iha kalendáriu ba loron tolu nian hodi halo transferénsia osan hosi munisípiu ba iha Postu sira. Bainhira BNCTL tranfere osan iha loron 08 juñu, entaun ami halo pagamentu iha loron 09 juñu. Se transfere iha loron 09 juñu mak ekipa pagamentu sei halo iha loron 10 juñu, nune’e to’o finaliza pagamentu,” dehan diretór MSSI.

Tuir nia, Patrimóniu Estadu mak suporta karreta hamutuk 181 ba ekipa pagamentu ba subsídiu iha Munisípiu sira.

“Ita hetan apoiu kareta husi Patrimóniu Estadu hamutuk 181. Karik la to’o mak ekipa pagamentu mós sei aluga karreta balu para suporta hodi bele apoiu ba iha ekipa hodi fasilita pagamentu ida ne’e. Karreta ami presiza atu aluga tan mak purvolta 148 hodi suporta karreta hirak ne’ebé mak Patrimóniu Estadu iha ona,” nia esplika.

Ekipa ne’ebé mak halo pagamentu ba subsídiu iha Munisípiu sira, nia dehan, sira iha direitu atu hetan osan tanba bazeia ba lei, depende ba sira-nia kargu xefia ka funsionáriu.

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here