Foto/Google.

DILI, (TATOLI)-Diretór Nasionál Saúde Públika Ministériu Saúde (MS), Pedro Canisio, informa komesa 6 novembru 2018 tabaku sira ne’ebé ho embalajen “fuma oho ita” sei lá importa no lá fa’an tan iha Timor-Leste.

Pedro dehan dekretu lei númeru 14/2016 kona-ba rejime kontrolu tabaku ne’ebé importa husi rai-li’ur no tabaku ne’ebé sirkula iha rai-laran ne’e, liuhusi dekretu refere kria fali tan diploma ministerial ida númeru 10/2018 ko’alia kona-ba rotulajen ka embalajen tabaku nian entrada iha vigor ona.

“Agora, diploma ministerial ida ne’e entrada en vigor tiha ona apartir 6 setembru importadór sira labele hatama sigarru sira ne’ebé maka ho nia embalajen lahanesan ho ida ne’ebé maka ita fó sai”, Pedro afirma iha Timor Plaza, ohin.

Nia dehan MS fó sai embalajen tabaku ne’ebé ko’alia katak masu tabaku ne’e kona-ba kankru, impoténsia, abortu, kardeovaskulár, entaun antes 6 setembru ne’e sigarru sira ne’ebé ho nia embalajen hakerek fuma oho ita ne’e labele tama tan iha Timór.

Tanba ne’e MS hakarak informa ba populasaun sira katak komesa iha loron ne’ebé termina ne’e labele fa’an tan sigarru sira ne’ebé ho embalajen fuma oho ita no laiha ne’e. Bainhira iha loron ne’e mak termina ona kontinua fa’an ekipa ida husi AIFAESA, Polísia, Imigrasaun, Saúde nian sei apreende (foti) hotu, no aplika tan selu koima.

“Iha infrasaun no aplika koima ruma ba sira ne’e depende ba sira-nia erru ne’ebé komete no iha variedade, hahú husi dólar 50 to’o 1000 no liuliu ba emprezáriu sira, ida ne’ebé halo importasaun tabaku mai Timor-Leste”.

Lei sobre embalajen ne’e fó sai husi MS no ema sira ne’ebé maka sei implementa maka husi Alfándega, Imigrasaun, Ministériu Turizmu, Komérsiu no Indústria, AIFAESA no parte relevante balun ne’ebé servisu hamutuk. Antes atu implementa lei ida ne’e sei halo sosializasaun uluk hodi nune’e operadór ekonómiku no ema hotu bele hatene.

Jornalista : Maria Auxiliadora

Editór : Manuel Pinto

HAKEREK NO HATÁN

Please enter your comment!
Please enter your name here