Diretór Jerál Ministeriu Soliedariedade Sosial no Inkluzaun (MSSI), Rui Manuel Gago Exposto. Imajen/Nelson Sousa

DILI, 02 juñu 2020 (TATOLI)–Diretór Jerál Ministériu Solidaridade Sosiál no Inkluzaun (MSSI), Rui Manuel Gago Expostu informa, aban, Ministériu Solidaridade Sosiál no Inkluzaun sei anúnsia kalendáriu pagamentu subsídiu $100 ba públiku.

Notísia Relevante: Pagamentu Subsídiu, Governu Sei Halo Koordenasaun ho BNCTL

“Aban ita-nia Ministra Solidaridade Sosiál no Inkluzaun sei anúnsia ita-nia kalendáriu pagamentu ba públiku. Kona-ba bainhira mak hala’o pagamentu ne’e aban mak ita-nia Ministra fó sai,” dehan Diretór Jerál MSSI, Rui Manuel Gago Expostu, ba Ajénsia TATOLI iha nia serbisu fatin, Caicoli, Dili, tersa ne’e.

Entretantu, Diretór Jerál ne’e hatete, prosesu pagamentu ba agregadu familiár sei akompaña hosi offisiál Ministériu Solidaridade Sosiál no Inkluzaun (MSSI) nian no Pesoál Administrasaun Suku (PAS) inklui autoridade lokál sira iha kada suku no aldeia.

“Ita halo pagamentu ne’e iha sede suku no autoridade lokál sira mak ajuda atu verifika dadus. Karik iha reklamasaun ruma hosi benefisíariu sira, autoridade lokál mak bele fó atendementu ba kestaun refere. Maibé MSSI nia funsionáriu mak kaer osan no fahe osan,” Diretór ne’e hateten.

Nia subliña, bainhira benefisíariu sira atu simu osan parte ekipa Ministériu Solidaridade Sosiál no Inkluzaun mós sei hasai foto no hodi arkiva para fasil atu deteta ema ne’ebé mak simu dobru (dala rua).

Tuir nia, dadus agregadu familiár barak mak elimina no dobru maibé ida ne’e la’ós kestaun. Tanba dadus sira ne’e Ministériu Administrasaun Estatal (MAE) mak halo Copy-Paste mak sira haluha la hamoos tiha entaun buat hirak ne’e mak hamosu dobru.

“Bainhira ita halo pagamentu ba sira, ita sei hatene tanba benefisíariu sira-nia foto ekipa pagamentu sei hasai no bainhira hakarak atu simu tan entaun sira-nia naran no foto sei hatudu iha tablet laran,” nia dehan.

Diretór ne’e hatutan, bainhira parte ekipa mak deteta benefisíariu komete erru ida-ne’e, nia na’in sei responsabiliza bazeia dekretu Governu tanba ne’e krime.

Notísia Relevante: MSSI Haruka ona Proposta Pagamentu Agregadus Familiár Hamutuk 326.739 ba MF

Jornalista : Osória Marques

Editór      : Cancio Ximenes

1 KOMENTÁRIU

  1. Ami husu ba MSS kontrolo ho regroso tamba funsionariu husi postu admnistrasaun Dili nian balun servisu lalos no servisu familiarismu, ligado rekolha dadus simu ajuda inudasaun nian, manipula dadus tamba ema balun uma laestragu simu matrial no osan hotu.

HAKEREK NO HATÁN

Please enter your comment!
Please enter your name here