Diretór Jerál Ministeriu Soliedariedade Sosial no Inkluzaun (MSSI), Rui Manuel Gago Exposto. Imajen/Nelson Sousa

DILI, 26 maiu 2020 (TATOLI)–Ministériu Solidaridade Sosiál no Inkluzaun (MSSI), ohin, entrega ona proposta pagamentu ba agregadus familiár hamutuk 326.739 ba Ministériu Finansas (MF) hodi haree no prosesa tuir regra orsamentál ne’ebé estabelesidu ona iha Timor-Leste.

Diretór Jerál MSSI, Rui Manuel Gago Expostu, hateten Governu nafatin promote katak esforsu nafatin hodi implementa pagamentu tanba Governu dekreta ona iha dekretu lei.

“Ohin, haruka tiha ona proposta pagamentu agregadus familiár hamutuk 326.739 ba Ministériu Finansas no ita hein de’it ninia prosesu. Maibé, Governu nafatin promote no esforsu nafatin hodi implementa pagamentu tanba Governu dekreta ona iha dekretu lei ne’ebé tenke implementa,” dehan Diretór Jerál MSSI, Rui Manuel Gago Expostu, ba Ajénsia TATOLI iha nia servisu fatin MSSI, Caicoli, Dili, tersa ne’e.

Diretór Jerál ne’e hateten, maski hela loron balun atu termina ona fulan maiu maibé Governu liuhosi MSSI esforsu nafatin no tenta ho kbiit ne’ebé iha para tenke realiza.

“Maibé ha’u hakarak informa katak antes halo pagamentu loron tolu, ita tenke informa ona ba públiku nune’e sira hatene. Bainhira seidauk iha informasaun ofisiál husi MSSI kona-ba kalendáriu pagamentu mak hein lai, nune’e haree prosesu implementasaun la’o ho di’ak,” nia esplika.

Nia afirma, prosesu pagamentu agregadus familiár ne’e liuhusi Banku Nasionál Komérsiu Timor Leste (BNCTL) depois uza konta bankária suku ninian hafoin fahe ba família uma-kain sira, maibé akompania mós hosi ekipa Ministériu Administrasaun Estatal (MAE) no MSSI nian.

“Mekanizmu pagamentu ita bele dehan semi manuál tanba la’ós banku mak foti direta maibé ekipa ho Autoridade Munisípiu foti osan iha banku mak selu ba agregadus familiár,” Diretór ne’e dehan.

Nia informa, bainhira halo pagamentu iha suku no aldeia mós sei kumpre regra ne’ebé Estadu dekreta ona hanesan distansiamentu fíziku no sosiál iha fatin pagamentu.

“Tanba ne’e mak agregadus familiar iha Munisípiu simu osan lahanesan no dala ruma Munisípiu ida uluk tiha. Depois liu loron ida ka rua ka kleur liu mak loron tolu Munisípiu seluk fali. Tanba, lista ema barak no depende ba banku atu lori osan hosi Nasionál to’o Munisípiu sira,” nia dehan.

Diretór ne’e husu atu bainhira halo pagamentu labele lori família barak tanba Ministériu Saúde (MS) no Organizasaun Mundiál Saùde (OMS) nafatin iha Estadu Emerjénsia ne’ebé tenke asegura distansia fíziku no minimiza grupu ka labele halibur ema barak iha fatin ida.

“Iha fatin pagamentu iha meza tolu. Ida ba Xefe Aldeia atu halo verifika dadus. Meza ida pagamentu no meza ida tan ba reklamasaun nian. Bainhira iha agregadus familiár balu hetan reklamasaun ba nia dadus entaun sira bele hetan kartaun reklamasaun no fila ba uma. Maibé depois liu loron 15 mak sira bele aprezenta sira-nia kartaun reklamasaun no sei hetan sira-nia pagamentu,” nia esplika.

Nia subliña katak agregadus familiár bainhira atu simu pagamentu tenke lori no hatudu fixa família no kartaun identidade ka eleitorál nune’e bele hetan pagamentu.

Notísia Relevante: FRETILIN-PD Husu Governu Esplika Pagamentu Subsídiu $100 Ne’ebé Atraza

Jornalista : Osória Marques

Editór     : Cancio Ximenes

HAKEREK NO HATÁN

Please enter your comment!
Please enter your name here