Diretor Jeral MSSI, Rui Manuel Gago Exposto

DILI, 30 maiu 2020 (TATOLI)–Diretór Jerál Ministériu Solidaridade Sosiál no Inkluzasaun (MSSI), Rui Manuel Gago Expostu, informa bainhira preparasaun dadus agregadu família ramata ona Governu sei informa kalendáriu pagamentu ba públiku liuhosi mídia sira.

Notísia Relevante: MSSI Haruka ona Proposta Pagamentu Agregadus Familiár Hamutuk 326.739 ba MF

Kona-ba prosesu pagamentu subsídiu nian, nia hatutan, oras ne’e Governu liuhosi MSSI sei halo koordenasaun ho Banku Nasionál Komérsiu Timor-Leste (BNCTL, sigla portugés) atu oinsá mobiliza no hetan rekursu hosi BNCTL atu akompañia pagamentu ba munisípiu sira iha territóriu ne’e.

“Bainhira preparasaun dadus ramata ona, ami sei infroma kalendáriu pagamentu ba públiku. Iha ne’e, ami sei konsentra ba subsídiu atu oinsá mak bele halo mobilizasaun ho parte BNCTL atu bele hetan rekursu hodi akompañia pagamentu ba to’o nunisípiu sira hotu,” dehan Diretór Jerál MSSI, Rui Manuel Gago Expostu, ba Ajénsia TATOLI liuhosi telefonika, sábadu ne’e.

Nia informa, ekipa ne’ebé atu halo pagamentu ba Munisípiu sira mai hosi funsionáriu MSSI, parte Polísia Nasionál Timor Leste (PNTL) no Falintil-Forsa Defeza Timor-Leste (F-FDTL) sira inklui autoridade lokál sira.

Atu aselera pagamentu iha munisípiu sira-ne’e la’o ho di’ak, nia hateten, parte Patrimóniu Estadu fó ona apoiu karreta 181 ba Ministériu Solidaridade Sosiál hodi halo pagamentu subsídiu $100 ba família uma-kain iha territóriu Timor-Leste.

Tuir nia, karreta hirak ne’e hosi parte Patrimóniu Estadu seidauk entrega ba MSSI tanba sei hein hela Governu atu fó sai kalendáriu pagamentu ba públiku liuhosi mídia sira.

“Ami hetan ona lista kareta hamutuk 181 maibé kareta hirak ne’e sei para iha patrimóniu Estadu ne’ebá. Kareta hirak ne’e seidauk entrega mai iha parte MSSI nian ne’ebé hein de’it ba kalendáriu pagamentu,” nia hateten.

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here