DILI, 01 juñu 2020 (TATOLI)-Governu Xina liuhosi ninia reprezentasaun iha Timor-Leste, kontinua promete hodi tulun Estadu Timor-Leste atu prevene propagasaun surtu coronavirus.
Kestaun ne’e hato’o husi Embaixadór Xina ba Timor-Leste, Xiao Jiangou, hafoin halo enkontru ida ho Primeiru-Ministru, Taur Matan Ruak, iha Palasiu Governu Dili, segunda (01/06/2020) ohin.
Notísia Relevante :Xina Entrega Ekipamentu Prevensaun Coronavirus ba TL
“Ohin ha’u halao enkontru ho Primeiru-Ministru atu informa katak Xina kontinua apoiu nafatin Timor-Leste hodi kombate COVID-19,” esplika, Diplomata Xineza ne’e.
Nia dehan Xina iha kbi’it atu haruka mós Médiku Xineza mai tulun profisionál saúde sira bainhira kazu COVID-19 aumenta.
Notísia Relevante :Governu Timor-Leste Simu Doasaun Kombate COVID-19 Husi Governu Xina
“Ami prontu apoiu médiku espesialista bainhira COVID-19 nia númeru sa’e maka’as no Timor-Leste presiza, ami sei apoiu médiku,”tenik tan.
Entertantu, antes ne’e Governu Xina entrega ona ekipamentu ba Timor-Leste hanesan termóscan, roupa protesaun, máskara, hand sanitizer no seluk tan.
Jornalista : Hortencio Sanchez
Editór : Agapito dos Santos