Xefe Operasaun g7+, Felix Piedade ne’ebé akompaña mós husi lider karizmátiku, Kay Rala Xanana Gusmão, entrega apoia solidariedade ba komunidade uma-kain 50 iha Suku Liurai, Postu Administrativu Remaxio, Muisípiu Aileu, sábadu (30/05/2020). Imajen/Eugénio Pereira

AILEU, 30 maiu 2020 (TATOLI) – Lider Karizmátiku, Kay Rala Xanana Gusmão ho ekipa g7+, sábadu (30/05/2020), dezloka ba Suku Liurai, Postu Administrativu Remexio, Munisípiu Aileu, hodi kontinua hala’o asaun solidariedade ba família uma-kain 50 ne’ebé susar tebes.

Molok ne’e, Xanana ho nia ‘saseluk’ sira mós halo asaun solidariedade ba uma-kain lubun iha Dili laran, iha Saoibada, Munisípiu Manatuto ho mós fatin seluk tan, hodi hatudu nia domin ba povu sira ne’ebé moris susar tebes iha ámbitu situasaun estadu emerjénsia ne’ebé la’o ona durante fulan-rua liu ona.

Notísia Relevante : Xanana Apoia Ai-han ba Komunidade no Padre-Madre iha Natarbora ho Soibada

Apoia solidariedade ne’ebé Xanana ho ekipa g7+ oferese ba uma-kain ne’ebé moris susar tebes ne’e hanesan foos, mina bimoli litru-lima (5), supermie ho ikan fresku hodi fahe direita ba abitante sira ne’ebé identifika ona.

Xefe Operasaun g7+, Felix Piedade dehan, apoiu ne’e sira oferese, hafoin haruka ekipa koopera ho xefe suku hodi identifika, nune’e sira konvida  Pesoa Eminente g7+, Kay Rala Xanana Gusmão ho ekipa hodi akompaña fahe apoiu ne’e.

“Ai-han hirak ne’e ekipa g7+ rasik fó apoiu nu’udar espíritu solidariedade atu iha tempu Estadu Emerjénsia,” informa Felix Piedade ba jornalista sira.

Xefe Suku Liurai, Jacinto da Costa Silva, hato’o agradese ba Komandante Ein-Xefe FALINTIL, Kay Rala  Xanana Gusmão, ne’ebé sempre hamutuk ho povu iha tempu susar nia-laran.

Hafoin fahe, apoiu ne’e, Xanana hasoru malu mós ho grupu juventude sira hodi diskute programa desportu, inklui sei fó apoiu fasilidade desportu ba joven feto no mane hanesan, bola, sapatu no farda sira.

Padre Parókia Remaxio, Giovanio Sousa de Melo no autoridade lokál sira asiste mós serimónia apoia solidariedade ba komunidade lubun iha suku refere.

Notísia Relevante : Xanana ho Key Fó Apoia Solidariedade ba Família Ne’ebé Susar Liu iha Susar Nia-Laran

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here