Lider Karizmátiku, Kay Rala Xanana Gusmão, look bua-malus ba inan-feton sira. Imajen/Eugénio Pereira

Manatuto, 28 maiu 2020 (TATOLI) – Ho situasaun propagasaun Coronavirus ka COVID-19 ne’ebé ‘obriga’ Estadu tenke deklara situasaun estadu emerjénsia (EE) mai tan mós ho dezastre naturaís (inundasaun) ne’ebé akontese iha territóriu nasionál, loron hirak liu ba, halo populasaun ua’in terus.

Notísia Relevante : Xanana ho Key Fó Apoia Solidariedade ba Família Ne’ebé Susar Liu iha Susar Nia-Laran

Populasaun balun, liuliu iha area remotas  susar tebes. Atu han di’ak iha loron-ida nia-laran, difisil tebes. Tanba ne’e, bolu Timoroan hotu  nia prontidaun  atu bele tulun malu iha situasaun difisil tebes ida-ne’e.

Lider Karizmátiku nu’udar mós Komandante Ein-Xefe FALINTIL, Kay Rala Xanana Gusmão,  ‘hatene’ momoos tebes sofrimentu populasaun sira-nian ne’e. Tanba ne’e,  nia sente katak nia ho Timoroan sira-seluk ne’ebé iha kbiit natoon  iha devér polítika no devér moral atu tulun fila-fali populasaun  sira ne’ebé susar liu hirak ne’ebé susar.

Kuarta (27/05/2020), Xanana liuhusi nia “saseluk” sira ne’ebé lidera husi Tomas do Rosario Cabral, hanesan mós intelektuál Manatuto-oan   dezloka ba Postu Administrativu Natarbora ho Postu Administrativu Soibada, ne’ebé pertense ba area jurizdisaun Munisípiu Manatuto nian, hodi lori mós ho ai-han balun atu fó apoia solidariedade ba família uma-kain-300-resin ne’ebé sofre inundasaun, tanba udan boot, foin lalais ne’e.

Ai-han sira-ne’e mak hanesan  supermie, foos ho mina bimoli, ne’ebé fahe balun mós ba Igreja Katólika Parókia Natarbora hodi entrega ba Padre Pároku Natarbora, Amu Benedictos Randug.

Apoia solidariedade ne’e fahe mós ba Madre Kongregasaun Dominikana Soibada hanesan foos karon 10, supermi kaixa 10 no mina bimoli Litru-lima (5) kaixa-rua (2) ne’ebé simu husi Madre Rosentina Ana de Deus.

Padre Benedictos Randug, hato’o agradese tebes ba apoiu ne’ebé fó husi Lider Karizmátiku, Kay Rala Xanana Gusmão, nu’udar jestu domin boot ba nia povu iha tempu situasaun Estadu Emerjénsia.

“Ha’u hato’o agradese ba Maun Boot Kay Rala Xanana Gusmão ne’ebé lori apoiu foos too mai ami iha Soibada, tanba semana kotuk, udan boot halo inundasaun maka’as afeta ba populasaun lubuk ida mak hetan terus boot. Ami sei halo esforsu hotu hodi fahe apoia sira ne’e ba populasaun ne’ebé sofre inundasaun,” hateten Padre Benedictos.

Iha fatin hanesan, Madre Rosentina Ana de Deus, hato’o agradese tanba durante situasaun Estadu Emerjénsia  Xanana Gusmão fó a-ihan ba madre no labarik sira ne’ebé hela iha ne’ebá bele konsumu.

“Ami ho labarik sira hato’o obrigadu ba Maun Xanana ne’ebé ho nia domin boot tebes ajuda ami. Ami agradese mós ba Maromak no hakarak reza ba maun Xanana liu-liu ba nasaun Timor-Leste atu moris iha pás, hakmatek no unidade,” Madre Rosentina Ana de Deus hateten.

Biban ne’e,  Tomas do Rosario Cabral esklarese katak, apoiu hirak ne’e tuir loos Xanana maka atu ba fahe, maibé tanba iha domingu too tersa  liubá Xanana halo hela viajen ba Aitana, Viqueque, hodi fó apoiu ba povu sira, tanba ne’e Xanana labele partisipa.

Jornalista     : Eugénio Pereira

Editór            : Francisco Simões

HAKEREK NO HATÁN

Please enter your comment!
Please enter your name here