Xanana akompaña Key Xavier entrega apoia solidariedade ba família hirak ne'ebé susar liu iha susar nia-laran iha Suku Ketutu, Postu Administrativu Kristu Rei, Munisípiu Dili, domingu (24/05/2020). Imajen/Eugénio Pereira

DILI, 24 maiu 2020 (TATOLI) – Lider Karizmátiku,  Kay Rala Xanana Gusmão ho Diretór Kompañia Badfor Lda, Key Xavier, domingu (24/05/2020), hala’o asaun solidariedade hodi fahe sasán nesesidade báziku ba abitante na’in-300  iha Suku Ai-Lok, Postu Administrativu Kristu Rei, Munisípiu Dili.

Sasán nesesidade báziku ne’ebé benefisiáriu simu hamutuk foos saka 300, mina, ikan fresku, ne’ebé Kay Rala Xanana Gusmão ho Key Xavier ba oferese direita sira ida-idak ne’ebé horik iha Aldeia Ketutu iha uma-kain 130, Aldeia Mariboro (70), Aldeia Kulau (50) ho Aldeia Karau-Maten 50.

Joana José Mendonça ho Filomena da Silva, nu’udar benefisiáriu ne’ebé simu asaun solidariedade husi Xanana ho Key Xavier, konsidera apoiu ne’e hanesan grasa  no domin  boot ne’ebé Xanana halo ba nia povu iha tempu susar nia laran.

“Ami kontente, tanba surtu Coronavirus ka COVID-19 halo ami tuur triste iha uma,  ami lori sasán ba fa’an iha merkadu ema la sosa, mas ami kontente Avó Xanana no ami nia alin Key fó apoiu mai ami ne’e hanesan grasa ida,” Joana José Mendonça hateten.

Filomena da Silva, hato’o agradese, tanba durante Estadu Emerjénsia sira enfrenta dezafiu oioin, liuliu la iha rendimentu natoon atu sustenta nesesidade uma-laran iha tempu Estadu Emerjénsia. Maibé, Xanana hatene ho didi’ak tebes sofrimentu povu ida-ne’e nian tanba dezde funu luta kontra invazaun Indonézia nian kedas mai to’o ohin-loron Xanana sempre ho povu no hatene povu nia terus.

“Corona ne’e halo ami susar tebes, lori modo tahan ba fa’an mós ema ladún sosa, ita osan arraska atu sosa hahán, maibé ho prezensa Avó Breok (Xanana, red), halo ami kontente tebe-tebes bele simu netik foos mina ho ikan,”  Filomena da Silva hateten.

Filomena hatutan, durante ne’e sira rasik hein apoiu husi Governu Timor-Leste atu fó subsídiu $100  ba kada família, maibé too ohin loron sira rasik hein apoiu ne’e seidauk fahe nafatin.

Parte seluk, Xefe Aldeia Ketutu, Agostino Pereira ho Xefe Suku Ai-Lok, Mário do Rego, hato’o agradese ba domin ne’ebé oferese husi Xanana no Key Xavier hodi apoiu família sira ne’ebé susar liu iha susar nia-laran.

“Apoiu ne’e fó kedas ba família hirak ne’ebé susar tebes ne’ebé ami identifika ona no sira merese duni atu simu apoiu ne’e,” Xefe Aldeia Agostino Pereira hateten.

Xefe Aldeia Maliboro, Aires do Rego mós apresia apoiu ne’ebé benefísiu direita ba abitante ne’ebé tama kategoria susar tebes.

Iha fatin hanesan, Kay Xavier dehan, apoiu ne’ebé nia ho Maun Boot Xanana oferese fó prioridade ba liu hirak ne’ebé susar liu entre sira ne’ebé susar durante tempu Estadu Emerjénsia.

Key Xavier dehan, apoiu ne’e ki’ik, maibé hanesan Timoroan nia hakarak fahe ninia domin ba Timoroan ne’ebé susar no moris iha susar nia-laran ne’ebé merese atu hetan apoiu.

“Asaun karidade ida ne’e mezmu ki’ik, maibé ha’u sente agradese ohin bele hamutuk ho Maun Xanana mai fahe direita liu-liu ba ita nia avó sira no faluk ho oan kiak-sira sustenta sira nia alimentasaun loron balun nia-laran,” dehan Key.

Komandante Ein-Xefe das FALINTIL, Kay Rala Xanana Gusmão dehan, apoiu ne’e oferese husi Timoroan Key no nia rasik akompaña hodi hatudu solidariedade no domin ba povu iha tempu situasaun Estadu Emerjénsia atu bele hakmaan sira-nia susar.

“Ha’u mai akompaña de’it ita nia alin ka imi nia maun-alin Key fó ajuda la barak, maibé importante nia mai hatudu nia domin ho apoiu ne’e imi bele han netik ho modo-tahan ruma,” Xanana hateten.

Xanana husu ba populasaun sira iha tempu Estadu Emerjénsia kontinua kuidadu-aan husi ameasa propagasaun COVID-19 too Governu deklara ona Timor-Leste livre foin povu bele hala’o fila fali atividade negósiu no atividade seluk-tan.

Tuir observasaun Ajénsia Tatoli durante fahe apoiu sira ne’e, Xanana fahe mós dosi, bebida, xokolate, inklui hahán ba labarik ki’ik sira no anima labarik sira hasai fotografia hamutuk.

Jornalista  : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here