Imajen Espesiál.

DILI, 29 maiu 2020 (TATOLI)–Prezidente Repúblika Francisco Guterres “Lú Olo”, ohin, sei fó pose ba membru VIII Governu Konstitusionál foun hamutuk na’in-ualu iha Palásiu Prezidensiál Nicolau Lobato, Bairru Pité, Dili, iha tuku 10:00 dadeersan.

Eis Sekretáriu Estadu Kombatente Libertasaun Nasionál (SEAKLN) ne’ebé Governu nomeia hikas sai Ministru ba Asuntu Kombatentes Libertasaun Nasionál (MAKLN), Júlio da Costa Sarmento “Meta Malik”, hateten konfiansa ida-ne’e la’ós tan partidu Fretilin ka partidu Polulár (PLP) maibé ba asume responsabilidade hodi serbí povu ho nasaun liuliu asuntu ne’ebé espesiál iha Timor-Leste.

Nia hatutan, nia asume pasta ne’e hodi kompleta de’it restu mandatu ne’ebé mak Governu Aliansa Mudansa Progressu (AMP) ne’ebé harii hela no kumpre de’it planu programa ne’ebé SEAKLN hala’o hela durante tinan rua (2) liubá kotuk.

“Ha’u la’ós ba kumpre mandatu foun iha tinan lima (5) maibé bá para kompleta restu mandatu ne’ebé mak Governu Aliansa Mudansa Progressu (AMP) ne’ebé harii hela maibé sira rasik monu tiha. Nune’e, ha’u ba kumpre de’it planu programa ne’ebé Sekretáriu Estadu Asuntu Kombate Libertasaun Nasionál (SEAKLN) hala’o hela durante tinan rua (2) liubá kotuk,” dehan Meta Malik ba Ajénsia TATOLI, via telefonika, sesta ne’e.

Nia hatutan, nia asume knaar ne’e atu kompleta servisu hirak ne’ebé Sekretáriu Estadu Asuntu Kombate Libertasaun Nasionál (SEAKLN) hala’o ona no servisu hamutuk hodi kontribui ba Timor-Leste.

“Ha’u espera katak buat hotu sei la’o di’ak tanba SEAKLN ne’ebé durante asume responsabilidade iha ne’ebá no hein para ha’u ba hodi kontribui ba malu hodi hala’o no kontinua ba planu tomak ne’ebé realiza ona. Servisu ne’ebé mak merese atu hamosu tan karik, ami sei servisu hamutuk hodi ho kontribuisaun tomak rai ida-ne’e nian, nune’e bele lori prosesu tomak to’o iha ninin no nia rohan,” Meta Mali haktuir.

Bainhira asume pasta MAKLN, ministru eleitu ne’e hatete katak nia sei la hamsou polítika foun maibé kontinua de’it planu estratéjiku sira ne’ebé mak durante ne’e sira hala’o ona no sei servisu hamutuk no rona parte hotu-hotu liuliu veteranu sira.

“Ha’u la ba mosu ho polítika foun ruma maibé kontinua de’it planu estratéjiku sira ne’ebé mak durante ne’e sira hala’o ona. Nu’udar Ministru ba koloka no separa de’it ne’ebé mak Sekretáriu Estadu Asuntu Kombatente Libertasaun Nasionál hala’o ho profisional no Ministru hala’o ho asaun polítika ho desizaun tomak. Maibé ha’u tenke rona hosi diresaun hotu-hotu no mós aspetu Veteranu hotu ne’ebé mak iha liur no mós iha laran. Liuliu ita-nia Maun boot sira ne’ebé luta tinan 24, agora balun sei iha vida militar no balun iha vida sivíl,” nia adianta.

Nia dehan, politikamente foti hanoin sira hosi parte hotu mak foin halo buat ida. Labele halo mesak tanba Ministru ona ne’ebé halo servisu mesak-mesak la’e, ne’e dehan ‘sombong’ (halo-aan) ka arrogante.

Ho ida ne’e, nia dehan, bainhira nia asume pasta refere nia sei haree no rona hosi funsionáriu sira hanesan kargu xefia no Diretór sira iha SEAKLN nian.

“Ha’u labele ko’alia buat ida antes tanba ha’u hakarak haree, ha’u hakarak hasoru no ha’u hakarak aproveita toos na’in sira tanba situasaun polítika Governu ne’e hanesan bainaka maibé na’in ba situasaun ne’e mak funsionáriu, xefe departamentu, Diretór no Sekretáriu Estadu sira iha ne’ebá. Ha’u ba para rona sira no hamutuk ho sira hodi foti asaun ruma, hodi progresu ne’ebé ita hein ba mandatu ikus ne’e,” nia subliña.

Tuir nia, ohin, nia asume kargu nu’udar Ministru Asuntu kombatente Libertasaun Nasionál (MAKLN) maibé la’ós foin asume maibé uluk kedas iha ne’ebá durante tinan rua maibé depois aprezenta remodelasaun.

“Ha’u la espera katak ha’u bele hetan konfiansa ida-ne’e hodi bele responsabiliza maibé konfiansa ne’ebé indizita mai hosi Primeiru-Ministru Taur Matan Ruak, ha’u laiha pensamentu negativu simu konfiansa ida-ne’e,” Meta Malik hateten.

Notísia Relevante: Aban, Xefe Estadu Fó Pose Ba Membru Governu Na’in-Ualu

Jornalista : Osória Marques

Editór       : Cancio Ximenes

HAKEREK NO HATÁN

Please enter your comment!
Please enter your name here