Komandante Ein-Xefe FALINTIL nu’udar mós lider karizmátiku, Kay Rala Xanana Gusmão, konversa ho juventude sira, hodi apela ba sira kontribui nafatin ba pás iha Timor-Leste. Imajen/Eugénio Pereira

DARE, 29 maiu 2020 (TATOLI)- Komandante Ein-Xefe FALINTIL nu’udar mós lider karizmátiku, Kay Rala Xanana Gusmão,  apela ba juventude ho veteranu rezisténsia sira, atu tuur hakmatek, hodi hadook-aan husi violénsia no krime hodi kontribui ba pás no estabilidade.

 Notísia Relevante : Xanana Apoia Ai-han ba Komunidade no Padre-Madre iha Natarbora ho Soibada

Xanana afirma katak, ohin loron Timor-Leste independénsia ona, labele fó fatin ba se de’it atu kria violénsia hodi halo povu fakar raan no terus beibeik.

Tuir Xanana, pás no dame nu’udar pasu importante atu juventude  kontribui para hamorin di’ak liután nasaun nu’udar país demokrasia ne’ebé kontribui ba dame, toleránsia ba malu ho hadomi-malu nu’udar valór umanu ne’ebé boot liu.

“Imi foin sa’e akompaña tuir para ikus fali mai halo tuir dalan loos, Estadu Emerjénsia sei iha, imi mós tenke halo tuir. Mais, importante liu mak labele iha tan violénsia, hadomi malu, hakuak malu, labele-labele, label liu hanoin katak atu iha oportunidade halo violénsia. Imi rona ka lae,” alerta Xanana Gusmão ba juventude sira iha Dare, hafoin hamutuk ho Krus Vermella Timor-Leste (CVTL, sigla portugés) hala’o asaun solidariedade hodi fó apoiu ai-han ba populasaun Dare, sesta (29/05/2020).

Xanana mós husu atu veteranu sira tenke sai ezemplu ba dame hodi labele kria konflitu atu halo deklarasaun ne’ebé la kontribui ba dame.

“Lalika fakar raan tan, agora tuur hamatek, hadomi-malu no hakuak malu,” Xanana afirma tan.

Apoia Ai-han

Xanana Gusmão koopera ho CVTL kontinua halo asaun solidariedade hodi fó apoiu ai-han hanesan foos karon 25 inklui mina ba família uma-kain 25 ne’ebé identifika susar tebes no presiza duni atu hetan apoiu.

Hafoin simu apoiu ne’e, populasaun sira ne’ebé hetan apoiu hato’o agradese ba Xanana no CVTL ne’ebé hatudu sira-nia solidariedade ba populasaun ne’ebé susar tebes iha situasaun estadu emerjénsia no esforsu estadu nian luta hasoru propagasaun surtu Coronavirus ka COVID-19.

Notísia Relevante : Xanana ho Key Fó Apoia Solidariedade ba Família Ne’ebé Susar Liu iha Susar Nia-Laran

Jornalista     : Eugénio Pereira

Editór             : Francisco Simões

1 KOMENTÁRIU

HAKEREK NO HATÁN

Please enter your comment!
Please enter your name here