Povu Timor-Leste simu lider Karizmátiku, Kay Rala Xanana Gusmão ho entuziazmu boot, hafoin Timor-Leste hetan soberania fronteira marítima permanente husi Australia. Imajen.Dok/ Eugénio Pereira

DILI, 29 maiu 2020 (TATOLI) – Esperiénsia “luta” diplomátiku ne’ebé Timoroan hetan iha prosesu terminasaun fronteira marítima (tasi) entre Timor-Leste ho Australia, sai hanesan lisaun kmanek tebes ba mundu.Notísia Relevante :  Xanana Enkoraja Nasaun Seluk Rezolve Disputa Fronteira Marítima Bazeia Ba UNCLOS

Eis Enviadu Espesiál Sekretáriu Jerál Nasoins Unidu mai Timor-Leste (UNTAET), Sukehiro Hasegawa. Imajen/Google

Ho esperiénsia ne’ebé sai mós hanesan istória “osan mean” mai Timoroan iha faze luta foun ba soberania total Timoroan nian ne’e sai mós hanesan atensaun ‘espesiál’ ida iha mundu nia futar matan, katak, oinsá mak Timor rai ki’ik no ‘povu kbiit laek’, maibé konsege lori Australia hanesan nasaun boot no ‘riku’ hodi tuur hamutuk rezolve ho dame terminasaun fronteira tasi nian entre rai-rua.

Ho susesu boot ba luta delimitasaun fronteira marítima nian ne’e, eis enviadu espesiál Sekretáriu Jerál Nasoins Unidu  mai Timor-Leste (UNTAET), Sukehiro Hasegawa, iha tempu badak, sei konvida Xefe Negosiadór Prinsipál Fronteira nian, Kay Rala Xanana Gusmão, Laureadu Nobel ba Paz nian, José Ramos Horta ho eis Ministru Prezidénsia Konsellu Ministru, Hermenegildo “Agio” Cabral Pereira Alves, hola parte iha konferénsia internasionál ida iha Japaun, hodi   fahe esperiénsia Timor-Leste nian  ba mundu kona-ba prosesu “luta diplomátiku ba terminasaun fronteira marítima entre Timor-Leste ho Australia.

Embaixadór Timor-Leste ba Japaun, Ilídio Ximenes da Costa, informa, konferénsia internasionál ne’e rasik sei hala’o iha outubru 2020 iha Japaun, maibé ajenda sei dependente mós situasaun pandemia COVID-19 ne’ebé akontese iha Japaun remata ona foin bele realiza.

Iha loron 19 marsu 2020, Embaixadór Ilídio Ximenes rasik hetan konvite husi Sukehiro Hasegawa  nu’udar mós Prezidente ba Asosiasaun Globál ba Konstrusaun Pás iha Japaun diskute ona planu atu realiza konferénsia ne’e.

Xanana ho Sukehiro Hasegawa halo vizita ida ba Oe-Cusse, tinan hirak-liu ba. Imajen/Google

“Iha outubru 2020, se Japaun deklara ona livre husi COVID-19, maka sei akontese mós konferénsia internasionál ne’ebé Profesór Hasegawa, ami na’in-rua diskute ona atu konvida ita nia lider istóriku sira hanesan, maun Xanana, maun José Ramos Horta ho maun Agio Pereira, atu fahe esperiénsia Timor nian kona-ba susesu luta manan Fronteira Marítima no prosesu konsiliasaun obrigatóriu ne’ebé TL halo ho Austrália. Nune’e, bele sai referénsia ida ba nasaun seluk, hanesan  Filipina, Tailándia, Indonézia, Malázia no Japaun rasik,” informa Embaixadór Ilidio Ximenes ba Ajénsia Tatoli, liuhusi mensajen WhatsApp, husi sidade Tokyo, sesta (29/05/2020).

Hasegawa rasik hakarak konvida Komandante Ein-Xefe FALINTIL, Kay Rala Xanana hodi ko’alia kona-ba Peace Building, tanba Hasewaga dehan, Timor-Leste iha esperiénsia di’ak no susesu iha mundu, iha altura Hasegawa sai hanesan reprezentante ONU iha TL nia haree katak, TL iha kapasidade atu rezolve konflitu sosiál ne’ebé akontese  iha rai-laran no  TL iha maneira no sistema úniku sai ezemplu ba nasaun sira iha mundu hanesan, Filipina, Tailándia, Indonézia, Malázia no Japaun rasik, inklui nasaun seluk tan ne’ebé iha tama iha konflitu liña fronteira tasi no rai.

Embaixadór Ilídio rasik halo ona konsultasaun no koordenasaun ho Ministériu Negósiu Estranjeiru no Kooperasaun Timor-Leste no Maun boot Xanana Gusmão, Agio Pereira ho José Ramos Horta hodi sai oradór prinsipál iha konferénsia refere.

Iha tópiku prinsipál rua relasiona ho susesu Delimitasaun Fronteira Marítima no Konstrusaun ba Pás. Sukehiro rasik hakerek ona livru ho títulu “Primordial Leadership, Peacebuilding and Nationality Ownership in Timor-Leste”, (Lideransa Primordial, Konstrusaun ba Pás no Propriedade Nasionalidade iha Timor-Leste) ne’ebé sei públika iha konferénsia internasionál ne’e.

 “Flashback” Uitoan  ba Luta FM ho Australia

Povu Timor-Leste simu lider Karizmátiku, Kay Rala Xanana Gusmão ho entuziazmu boot, hafoin Timor-Leste hetan soberania fronteira marítima permanente husi Australia. Imajen.Dok/ Eugénio Pereira

Prosesu luta ekipa negosiasaun fronteira marítima nian ne’ebé lidera husi Xanana ba fronteira marítima ho Australia la’ós buat foun no la’ós fasil hanesan “membalikan telapak tangan” iha lian Indonézia.

Xanana  nu’udar lidér vizionáriu. Dezde iha tempu rezisténsia nia-laran, iha tinan 1988, Xanana haruka ona  karta ba senadór Austrália, Gordon McIntosh, nu’udar karta protestu ida hasoru Primeiru-Ministru Austrália, Bob Hawke, iha momentu ne’ebá.

Iha Komandante ein-Xefe FALINTIL nia  karta ne’e hateten ba Bob Hawke dehan, kona-ba rai barak ne’ebé independente mas konsidera hanesan kiak liu hotu iha planeta, maibé rai balun iha de’it kopra (nuu-maran) atu esporta ho turizmu bele moris no mós balun ho de’it peska. Haree husi “kondisaun mínima” ho rekursu minerais ne’ebé iha, ba dezenvolvimentu rasik Timor-Leste la’ós “repúblika de bananas”, maibé bele nakfilak-aan sai ba “repúblika de petróleu”.

Notísia Relevante : Ratifikasaun Tratadu Fronteira Marítima Garante Independénsia Ekonómika

Vizaun Xanana nian ba dezenvolvimentu Timor-Leste ne’ebé prósperu liuhusi esplorasaun rikeza iha Tasi Timor mosu ona dezde iha tempu rezisténsia. Sasin balun hakerek iha mídia sira iha mundu katak, durante Xanana iha prizaun Cipinang-Jakarta, hakerek poezia no pintura ida ho títulu “MAR MEU” (ha’u nia tasi) hodi tatoli, “Hahú ha’u nia lian ba tasi timór, hatutan mós ha’u nia lian ba rai li’ur ba rai doben ne’e nia futuru ukun aan,” hodi espresa esperansa boot atu jerasaun foun sira iha futuru bele aproveita riku-soin ne’e hodi dezenvolve Timor-Leste.

Mehi bele sai realidade, bainhira persiste no kontinua luta ho pasiénsia. Hanesan rezultadu ne’ebé mosu ohin loron, liu tinan 45 nia laran, mehi ne’ebé Xanana iha sai duni realidade. Tanba luta ba okupasaun tasi Timor nian remata ona, iha loron 6 Marsu 2018, hafoin Austrália no Timor-Leste asina akordu fronteira marítima ba dahuluk entre nasaun rua ne’e. Akordu ne’ebé asina iha Kuartél Jerál ONU, iha Novaiorke ne’e, atu bele solusiona disputa kona-ba mina no gás iha Tasi Timor.

Governu Timor-Leste mós hahú konsiliasaun obrigatória tuir Nasoins Unidas nia Konvensaun ba Lei Tasi nian iha fulan-Abríl tinan 2016. Hafoin disputa ne’ebé naruk, Timor-Leste hahú prosesu ne’e hodi lori Austrália ba meza negosiasaun nian, atu nune’e, povu Timor bele hetan nia direitu soberania no hetan fronteira marítima permanente iha Tasi Timor.

Konsiliasaun obrigatória ne’e prosesu ida ne’ebé la kesi parte sira. Prosesu ne’e la’o ho painél konsiliadór matenek na’in sira hodi fó asisténsia ba parte Estadu sira hodi hetan rezolusaun amigavél ida ba sira nia disputa.

Prosedimentu ne’e bele uza ba sirkunstánsia sira bainhira la iha akordu entre nasaun viziñu sira ne’ebé fahe malu ho tasi no Estadu ida deklara tiha ona hodi sai husi órgaun hirak ne’ebé bele buka rezolusaun obrigatória ba disputa sira tuir Konvensaun kona-ba fronteira marítima nian.

Akordu entre Timor-Leste no Austrália ne’e reprezenta marka signifikativu no istóriku ida ba orden jurídika internasionál no ezemplu ida ba rezolusaun pasifika ba disputa marítima kompleksu sira iha mundu tomak.

Disputa marítima ne’e baibain han tinan barak, se lae han dékada barak hodi rezolve, maibé ho orientasaun Komisaun Konsiliasaun ONU nian ne’e, Timor-Leste no Austrália rezolve sira nia fronteira marítima iha de’it tinan ida resin.

Hafoin hakat liu vitória ne’e, iha selebrasaun aniversáriu referendu Timor-Leste ba dala-19 (XIX) (30 Agostu 1999 -30 Agostu 2018), Xanana lansa hikas livru daruak ho títulu ‘Fronteira Foun: Timor-Leste Nia Konsiliasaun Istórika Kona-ba Fronteira Marítima iha Tasi Timor’.

Xanana agradese hodi harohan Ba Maromak, Igreja no hamulak ba rai-lulik Timor-Leste no eroi sira ne’ebé mate ba rai ne’e katak, luta ne’e la’ós ba nia interese, maibé prepara ba futuru jerasaun Timor-Leste.

“Tratadu Fronteira Marítima ho Austrália nu’udar úniku objetivu ida hodi garante dezenvolvimentu povu Timor no garante povu Timor nia moris ho dignidade,” Xanana afirma bainhira lansa livru ‘Fronteira Foun: Timor-Leste Nia Konsiliasaun Istórika Kona-ba Fronteira Marítima iha Tasi Timor ne’e iha Muzeu Rezisténsia, Dili.

Livru kona-ba prosesu konsiliasaun ho Austrália refleta kapítulu importante iha istória nasaun ki’ik ne’ebé hakarak haree ninia direitu rekoñesimentu hodi surpreza dezafiu konstante sira hodi lembra ba beibeik Timór nia-luta difisil ba liberasaun kontra okupasaun husi viziñu poderozu ida ho asesu rekursu no meius sira ne’ebé labele kompara ho Timor.

Jornalista     : Eugénio Pereira 

Editór            : Francisco Simões

 

HAKEREK NO HATÁN

Please enter your comment!
Please enter your name here